މޯލްޑިވިއަންގެ ފުރަތަމަ ވައިޑް ބޮޑީ މަތިންދާބޯޓު، އޭ330-200 މިއަދު ހަވީރު 5:25 ގައި ވެލާނާ އިންޓަނޭޝަނަލަށް އެއާޕޯޓަށް ޖައްސާނެ އެވެ.
މި ބޯޓު މިއަދު ރާއްޖެއަށް އަންނަނީ ސިންގަޕޫރުން ދަތުރު ފަށައި، ސްރީލަންކާގައި މަޑުކުރުމަށް ފަހު އެވެ. އަދި މި ބޯޓަށް މަރުހަބާ ކިޔުމުގެ ގޮތުން މިއަދު ހަވީރު މާލޭގައި އެއާ ޝޯއަކާއި އިތުރު ހަރަކާތްތައް ބާއްވަން ވަނީ ނިންމައިފަ އެވެ.
މޯލްޑިވިއަން އިން ބުނީ މި ބޯޓުގެ ޕައިލެޓުންނާއި ކްރޫގެ ތެރޭގައި ހިމެނެނީ ދިވެހިން ކަމަށެވެ. އެ ބޭފުޅުންގެ ފޮޓޯއެއް ވެސް މޯލްޑިވިއަންގެ ސޯޝަލް މީޑިއާގައި ހިއްސާކޮށްފައިވެ އެވެ.
Advertisement
މޯލްޑިވިއަންގެ މި ބޮޑު ބޯޓުގައި ތިން ކުލާހެއް ހިމެނެެ އެވެ. އެއީ ބިޒްނަސް ކުލާހުގެ 18 ގޮނޑި އާއި ފްރިމިއަމް އިކޮނޮމީ ކުލާހުގެ 36 ގޮނޑިއާއި އިކޮނޮމީ ކުލާހުގައި 210 ގޮނޑި އެވެ. އަދި އެ ބޯޓުގައި އެއްފަހަރާ 264 ފަސިންޖަރުންނަށް ދަތުރުކުރެވޭނެ އެވެ.
މޯލްޑިވިއަން އިން އެއާޝޯ ބާއްވަނީ މިއަދު ހަވީރު 5:00-5:30 އަށެވެ. އެއީ މާލޭގެ އުސްފަސްގަނޑު ސަރަހައްދުގެ އިތުރުން، ހުޅުމާލެ 1 އަދި 2 ގެ އިރުމަތީ ފަރާތު އަތިރިމަތީގަ އެވެ.
އެ ކުންފުނިން ބުނި ގޮތުގައި، އެއާބަސް އޭ-330 މަރުކާގެ ބޯޓު ރާއްޖެ ގެނެސް، ދަތުރުތައް ފަށަން ހުރިހާ ތައްޔާރީތަކެއް ވަނީ ވެފަ އެވެ. ދުރު މަންޒިލަށް ދަތުރުކުރެވޭ ބޯޓަށް 21 މުވައްޒަފުން ވަނީ ނަގައިފަ އެވެ. އަދި ދަތުރުތައް އެންމެ ފުރަތަމަ ފަށަނީ ޗައިނާއަށެވެ.
