ބޯކޮށް ވާރޭވެހި ކަނޑު ވެސް ގަދަ މި ދަނޑިވަޅުގައި ނަރުދޫއަށް އުދަ އަރައިފިއެވެ.
ނަރުދޫ ކައުންސިލްގެ ރައީސް މުހައްމަދު މުސްތަރުސިދު ވިދާޅުވީ، ބަނދަރުގެ ބޭރު ނެރު ފުރިހަމަ ނުވެ، އެ ސަރަޙައްދުގައި ރާޅުތައް ބޮޑުވުމުން ލޮނުގަނޑު މައްޗަށް އަރައި ނުރައްކާ ބޮޑުވެފައިވާ ކަމަށެވެ.
ރޭއްސުރެ މޫސުން ގޯސްވުމުގެ ސަބަބުން 12 ގެއަކަށް ލޮނުފެން ވަދެ، މުދަލާއި ގަސްގަހާގެހި، އަދި ދިރޭތަކެތީގެ ބާވަތްތަކަށް ގެއްލުން ލިބިފައިވާ ކަމަށް ވެސް ކައުންސިލް ރައީސް ވިދާޅުވިއެވެ.
Advertisement
މި މައްސަލަ ޙައްލުކުރުމަށް މަސައްކަތްތައް ކުރިއަށްދާއިރު، ކައުންސިލުން ވަނީ ކަމާބެހޭ ފަރާތްތަކާއި އެމްޓީސީސީއާ ގުޅިގެން މި މަޝްރޫއު އަވަސްކޮށް، އެކަމުގެ އަސަރު ކުޑަކުރުމަށް މަސައްކަތްތައް ފަށާފައެވެ.
އެމްއެންޑީއެފް އުތުރު އޭރިއާ ކޮމާންޑުން ނަރުދޫގެ ޙާލަތު އެނގުމާއެކު ވަގުތުން ފިޔަވަޅު އަޅައި މިއަދު ހެނދުނުއްސުރެ ނަރުދޫގައި ފެން ހިންދުމުގެ މަސައްކަތުގައި ދަނީ އެހީތެރިކަން ފޯރުކޮށްދެމުންނެވެ.
ބޯކޮށް ވާރޭ ވެހުމާާއި އުދަ އެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެގެން ރިޕޯޓު ލިބިފައިވާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ބުނެފައެވެ. އެއީ އުދަ އަރައިގެން ށ. ނަރުދޫ އާއި ރ. އިނގުރައިދޫ އަދި ވާރޭ ވެހި ފެންބޮޑުވެގެން ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫ ކަމަށް އެންޑީއެމްއޭ އިން ބުންޏެވެ.
އެންޑީއެމްއޭ އިން ބުނީ ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން ހަރަކާތްތެރިވަމުން އަންނަ ކަމަށެވެ. އަދި އެއްވެސް ޙާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަމަށްވެސް އެންޑީއެމްއޭ އިން ބުންޏެވެ.
