މި ސަރުކާރުން ތަރައްޤީކުރަން ނިންމާފައިވާ 20 އެއާޕޯޓްގެ ކޮންސެޕްޓް ޑިޒައިން މުޅިން ނިމި، ބައެއް އެއާޕޯޓްތަކަށް މިހާރު އިންވެސްޓަރުން ވެސް ލިބިފައިވާ ކަމަށް ރީޖަނަލް އެއާޕޯޓްސް ކޮމްޕެނީ (އާރްއޭސީއެލް) އިން ބުނެފިއެވެ.
އިންޓަރނޭޝަނަލް ފަސް އެއާޕޯޓާއި ޑޮމެސްޓިކް 14 އެއާޕޯޓާއެކު ޖުމްލަ 19 އެއާޕޯޓެއް މިހާރު ވެސް ރާއްޖޭގައި ހިންގަމުން އަންނައިރު، އާރްއޭސީއެލްގެ މެނޭޖިންގ ޑިރެކްޓަރު އަހުމަދު މުބީން ދައުލަތުގެ މީޑިއާ، ޕީއެސްއެމްގައި ވިދާޅުވީ އެއާޕޯޓްތައް ތަރައްޤީކުރަން ޝައުޤުވެރިކަން ފާޅުކުރި އިންވެސްޓަރުންނާ ގުޅޭ ލިޔެކިޔުންތައް އިކޮނޮމިކް ކައުންސިލަށް ފޮނުވުމަށް މިހާރު ތައްޔާރުވަމުން އަންނަ ކަމަށެވެ.
"ސަރުކާރުން ދެން ނިންމަވާނީ އެއާޕޯޓްގެ މަސައްކަތް ކޮން ދިމާލަކަށް ކަމަށް، ނުވަތަ ކޮން ބަޔަކާކަން ހަވާލުކުރާނީ. ކުރެހުންތައް ތައްޔާރުކޮށް، އެއިން ކޮންމެ ތަނަކަށް ޚަަރަދުވާނެ ވަރު ބަލަމުން ދަނީ." އޭނަ ވިދާޅުވިއެވެ.
Advertisement
މިހާރު ވެސް ޑޮމެސްޓިކް ހަތަރު އެއާޕޯޓެއްގެ މަސައްކަތް އަންނަނީ ކުރަމުންނެވެ. އެއީ މ. މުލީ އެއާޕޯޓާއި ފ. މަގޫދޫ އެއާޕޯޓާއި ރ. އަލިފުށްޓާއި ހދ. މަކުނުދޫ އެއާޕޯޓްގެ މަސައްކަތެވެ.
މީގެ ތެރެއިން ދެން އެންމެ އަވަހަށް ހުޅުވާނީ މުލީ އެއާޕޯޓެވެ. އެއީ އަންނަ މާޗް މަހު އެވެ.
މުބީން ވިދާޅުވީ އެއާޕޯޓްތައް ހިންގަމުން އަންނަ ރަށްތަކުގައި ވިޔަފާރީގެ އިތުރު ހަރަކާތްތައް ކުރިއަށް ގެންދެވޭނެ ގޮތްތަކެއް ވެސް ބަލަމުން އަންނަ ކަމަށެވެ. އެގޮތުން ކައުންސިލްތަކާ ގުޅިގެން އެ މަސައްކަތްތައް ކުރަމުން އަންނަކަމަށާއި އެކަމަށްޓަކައި މާސްޓަރ ޕްލޭން އެކުލަވާލުމަށް ނިންމަވާފައިވާ ކަމަށް ވެސް ވިދާޅުވިއެވެ.
މުބީން ވިދާޅުވީ، އަލަށް ތަރައްޤީކުރުމަށް ހަމަޖެހިފައިވާ ކޮންސެޕްޓްތަކުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ އއ. މަތިވެރި އެއާޕޯޓް ވެސް ހިމެނޭކަމަށެވެ.
