މައްކާގައި އުމްރާގެ އަޅުކަން އަދާކުރުމަށް ގޮސް އުޅެނިކޮށް ގެއްލިގެން ހޯދަމުންދިޔަ ދިވެހި އުމްރާވެރިޔާ، ޏ. ފުވައްމުލަކު / ސްޓެލާ، ހުސެއިން މުޙައްމަދު ދީދީ ގަދަވެ ސަލާމަތުން ހުއްޓާ ފެނިއްޖެއެވެ. މިކަން ހާމަކޮށްފައިވަނީ ޔަލަމްލަމް ހައްޖު އެންޑް އުމްރާ ގްރޫޕުންނެވެ.
ޔަލަމްލަމް ގްރޫޕުން މައުލޫމާތު ދިންގޮތުގައި ހުސެއިން މުޙައްމަދު ދީދީ ފެނިފައިވަނީ އިއްޔެގެ ވަގުތެއްގައެވެ. އަދި އޭނާ ފެނުނު ތަނަކީ އެ ގްރޫޕުގެ މެމްބަރުން ތިބޭ ހޮޓެލް ކައިރިކަމަށްވެސް އެ ގްރޫޕުން ބުންޏެވެ.
ހުސެއިން ގެއްލިގެން ހޯދަން ފެށީ އިއްޔެގެ ވަގުތެއްގައެވެ. ޔަލަމްލަމް ގްރޫޕުން ހާމަކުރި ގޮތުގައި ހުސެއިން ގެއްލުނީ އުމްރާގެ އަޅުކަން އަދާކުރަމުން ދަނިކޮށެވެ. އަދި އޭނާ އެންމެ ފަހުން ފެނިފައިވަނީ އުމްރާގެ އަޅުކަން ފުރިހަމަ ކުރުމަށް ސަފާ އަދި މަރުވާ ދެމެދު ސައުޔު ކުރަމުންދަނިކޮށެވެ.
Advertisement
ޔަލަމްލަމް ގްރޫޕުން ބުނީ ހުސެއިން ފެނުނީ ދިވެހީންގެ ބަޔަކަށެވެ. ނަމަވެސް އިތުރު ތަފްސީލެއް އެ ގްރޫޕުން ހާމަކޮށްފައެއް ނުވެއެވެ.
މި ހާދިސާއާ ގުޅިގެން އުމްރާވެރިންނަށް ސަމާލުވުމަށް އިރުޝާދު ދެމުން، ޔަލަމްލަމް ގްރޫޕުން ވަނީ އުމްރާގެ އަޅުކަން އަދާކުރާއިރު އެއްބަޔަކު އަނެއްބަޔަކަށް ސަމާލުވެ، ގްރޫޕުން ވަކިނުވެ ތިބުމަށް އިލްތިމާސްކޮށްފައެވެ. އަދި މިފަދަ ހާދިސާއެއް ދިމާވެއްޖެނަމަ ވަގުތުން ގްރޫޕުގެ ލީޑަރުންނަށް އަންގަން ޖެހޭނެ ކަމަށްވެސް އެ ގްރޫޕުން ބުންޏެވެ.
