މިނިސްޓްރީ އޮފް ޓޫރިޒަމްގެ ސްޓޭޓް މިނިސްޓަރު މުޙައްމަދު ނިހާދު ސަސްޕެންޑް ކޮށްފިއެވެ.
އެނގިފައިވާ ގޮތުގައި އޭނާ ސަސްޕެންޑްކުރީ ޕީއެންސީން ރޭ ބޭއްވި ޖަލްސާގައި، އެމްޑީޕީން ރިސޯޓުތަކަށް އަރަން އުޅޭ ކަމަށް ބުނެ އެއީ ޓެރަރިޒަމްގެ ޙަމަލާއެއް ކަމަށް ތުހުމަތު ކުރުމުންނެވެ.
Advertisement
ރޭ ނިހާދު ވިދާޅުވީ، އިދިކޮޅުން ރިސޯޓުތަކަށް އަރައިގަތުމަކީ ބަލައިގަނެވޭނެ ކަމެއް ނޫން ކަމަށާއި، އެފަދަ ޢަމަލުތައް ހިންގަނީ ރާއްޖޭގެ އިމޭޖް ހުތުރުކޮށްލުމުގެ މަޤްޞަދުގައެވެ. ރިސޯޓުތަކަށް އެރުމުން ރާއްޖެއަށް އިންވެސްޓަރުން ލިބުމާއި ފަތުރުވެރިމް އައުން ހުއްޓޭނެ ކަމަށް ނިހާދު ޤަބޫލުކުރައްވައެވެ. ނިހާދު ވިދާޅުވީ، އެފަދަ ޢަމަލުތަކަކީ އޭނާ ޤަބޫލުކުރައްވާ ގޮތުގައި ޓެރަރިޒަމް ފަދަ ޢަމަލުކަމަށް ސިފަވާ ކަމަށެވެ.
ނިހާދު ރޭ ދެއްކެވި ވާހަކަތައް ކުށްވެރިކޮށް އެމްޑީޕީން ވަނީ ނޫސްބަޔާނެއް ވެސް ނެރެފައެވެ. އެ ނޫސްބަޔާނުގައި، ރާއްޖެއަށް ޓެރަރިސްޓް ޙަމަލާއެއް ދިނުމަށް ރާވާކަމަށް ޓޫރިޒަމްގެ ދާއިރާގައި މަސައްކަތްކުރައްވާ ބޭފުޅަކު ވިދާޅުވުމަކީ އެއްވެސް ޙާލެއްގައި ކޮށްގެންވާނެ ކަމެއް ނޫންކަން ބަޔާންކޮށްފައި ވެއެވެ. ނިހާދުގެ ވާހަކަތަކަކީ ޓޫރިޒަމްގެ ސިނާޢަތަށް ފޫނުބެއްދޭނެ ގެއްލުންތަކެއް ލިބިދާނެ ކަމެއް ކަމަށް ބަޔާން ކޮށްފައި ވެއެވެ.
