މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އައްޑޫ އިކުއެޓޯރިއަލް ހޮސްޕިޓަލަށް ދެ ސްޓޯރޭޖް ކޮންޓޭނަރު ހަދިޔާ ކޮށްފިއެވެ.
އެމްޕީއެލްއިން ބުނީ ސީއެސްއާރްގެ ދަށުން، އައްޑޫ އީކުއެޓޯރިއަލް ހޮސްޕިޓަލްގައި ދިމާވެފައިވާ ސްޓޯރޭޖްގެ ދަތިކަން ހައްލުކުރުމަށް އެހީތެރިވުމުގެ ގޮތުން އެ ކުންފުނިން ވަނީ އެ ހޮސްޕިޓަލަށް 40 ފޫޓުގެ ދެ ސްޓޯރޭޖް ކޮންޓޭނަރު ހަދިޔާކޮށްފައި ކަމަށެވެ.
Advertisement
އެ ސްޓޯރޭޖް ކޮންޓޭނަރުތައް އައްޑޫ އީކުއެޓޯރިއަލް ހޮސްޕިޓަލަށް ރަސްމީކޮށް ހަދިޔާކުރެއްވުމުގެ ގޮތުން އެމްޕީއެލްގެ ސީއީއޯ މުހައްމަދު ވަޖީހް އަދި ކުންފުނީގެ ބައެއް އިސްވެރިން ވަނީ އައްޑޫ އީކުއެޓޯރިއަލް ހޮސްޕިޓަލްގެ ސީއީއޯ ޑރ. އިބްރާހިމް ޔާސިރު އަހްމަދު އަދި އެ ހޮސްޕިޓަލްގެ އިސްވެރިންނާ ބައްދަލުކުރައްވައިފައި ކަމަށް އެމްޕީއެލްއިން ބުނެއެވެ.
އައްޑޫ އެކުއެޓޯރިއަލް ހޮސްޕިޓަލަކީ، 102 އެނދުގެ ޓާޝަރީ ހޮސްޕިޓަލެކެވެ. އެއީ ދެކުނުގައި ރައްޔިތުންނަށް ހިދުމަތްދޭ އެންމެ ބޮޑު ހޮސްޕިޓަލް ވެސް މެއެވެ. އެ ހޮސްޕިޓަލުން ޒަމާނީ ގިނަ ހިދުމަތްތަކެއް ލިބެން ހުރެއެވެ. އަދި ބައެއް ބޮޑެތި އޮޕަރޭޝަން ވެސް އެ ހޮސްޕިޓަލުން ކުރެވެއެވެ. ނަމަވެސް ގިނަ ބަޔަކު އަންނަނީ ރަނގަޅު ހިދުމަތްތަކާއި ފެންވަރު ރަނގަޅު ޑޮކްޓަރުން ހޮސްޕިޓަލުގައި ނެތް ކަމަށް ބުނެ ކަންބޮޑުވުން ފާޅު ކުރަމުންނެވެ.
މީގެ އިތުރުން ވެސް އެކްސިޑެންޓްތަކުގައި ބޮޑެތި ޒަހަމްތައްވާ މީހުންނަށް ހޮސްޕިޓަލުން ފަރުވާ ނުދެވި، މާލޭ ގެންދަން ޖެހޭ ފަހަރު ވެސް މަދެއް ނުނެވެ. އެހެންކަމުން ގިނަ ބައެއްގެ ޝަކުވާތައް އަންނަނީ އިތުރުވަމުންނެވެ.
