''މަދަހަ ރަންއަޑު'' މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ.
މި މުބާރާތަކީ މޯލްޑިވްސް މިއުޒިކް އެންޑް އާޓްސް ސެންޓަރ އިން ސިލްސިލާކޮށް، ކުރިޔަށް ގެންދާ މަދަހަ މުބާރާތެކެވެ.
މި މުބާރާތުގެ 6 ވަނަ ސީޒަން ކުރިއަށްގެންދިއުމަށް ހަމަޖެހިފައިވަނީ އަންނަ ރަމަޟާން މަހުގެ ތެރޭގައެވެ.
Advertisement
މި މުބާރާތުގައި 6 އަހަރުން ދަށް، 9 އަހަރުން ދަށް، 11 އަހަރުން ދަށް، 13 އަހަރުން ދަށް، 16 އަހަރުން ދަށް، 18 އަހަރުން ދަށް އަދި 18 އަހަރާއި 35 އަހަރާއި ދެމެދުގެ ޒުވާނުންގެ އުމުރުފުރާތައް ބައިވެރިވުމުގެ ފުރުޞަތު ވަނީ ހުޅުވާލާފައެވެ.
މޯލްޑިވްސް މިއުޒިކް އެންޑް އާޓްސް ސެންޓަރުން ބުނީ މި މުބާރާތުގައި ކޮޕީ ރާގާއި، ކޮޕީ ޅެން، އަދި އަމިއްލަ ރާގާއި އަމިއްލަ ޅެން ބައިވެރިކޮށް ހުށަހެޅޭނެ ކަމަށެވެ. އަދި އަތޮޅުތަކުގެ ބައިވެރިން މި މުބާރާތަށް ރެކޯޑް ކުރާ މަދަހަ ސްމާޓް ފޯން ބޭނުންކޮށްގެން ރެކޯޑް ކުރެވިދާނެ ކަަމަށާއި، މި މުބާރާތަށް ޚާއްސަކޮށްގެން ޤާއިމްކުރާ ސްޓޫޑިއޯ ސެޓްގައިވެސް ޝޫޓް ކުރުމުގެ އިންތިޒާމް ހަމަޖެހިފައިވާނެ ކަމަށް އެ ސެންޓަރުން ބުންޏެވެ.
މިކަމާގުޅޭ އިތުރު މަޢުލޫމާތު މޯލްޑިވްސް މިއުޒިކް އެންޑް އާޓްސް ސެންޓަރުގެ ނަންބަރު 9990997އާ ގުޅައިގެން އަދި ވައިބަރ މެދުވެރިކޮށް މެސެޖުކޮށްގެން ކުރިއަށް ގެންދިއުމަށް އެ ސެންޓަރުން ވަނީ އެދިފައެވެ.
