ދައުލަތުގެ މާލީ ނިޒާމު ހަރުދަނާކޮށް، އެކިއެކި ދާއިރާތައް އިޞްލާޙު ކުރުމުގެ މަސައްކަތް އަވަސްކުރުމަށް އުފައްދާފައިވާ އިކޮނޮމިކް ރިފޯމް އޮފީހުގެ "ކޮމިޝަނާ އޮފް ރިފޯމް" ގެ މަޤާމަށް ހއ. އިހަވަންދޫ، ވައިޖެހޭގެ، އަސްމާ ޝަފީއު އައްޔަންކޮށްފިއެވެ. މި މަޤާމަށް އަސްމާ އައްޔަންކޮށްފައިވަނީ ދެ އަހަރުގެ މުއްދަތަށެވެ.
އަސްމާ އެންމެ ފަހުން މަސައްކަތް ކުރައްވާފައިވަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމުގައެވެ. އަސްމާ ވަނީ މީރާގައި 14 އަހަރު ޚިދުމަތްކުރައްވާފައެވެ.
ކޮމިޝަނަރ އޮފް ރިފޯމްގެ މަޤާމުގެ މަސްއޫލިއްޔަތުތަކުގެ ތެރޭގައި ސީދާ ފިނޭންސް މިނިސްޓަރަށް ރިޕޯޓުކުރުމާއި، މިނިސްޓަރަށް ބޭނުންވާ ލަފާ ދިނުން ހިމެނެއެވެ. މި މަޤާމަށް މީހަކު ހޯދުމަށް ކުރި އިޢުލާނުގެ މުއްދަތު ހަމަވެފައިވަނީ މި މަހުގެ 8 ވަނަ ދުވަހުއެވެ.
Advertisement
މި މަޤާމުގެ މައިގަނޑު ޝަރުޠުތަކުގެ ތެރޭގައި އެކައުންޓިންގ ނުވަތަ ފައިނޭންސްގެ ދާއިރާއިން ޑިގްރީއެއް އޮތުމާއި، ގުޅުންހުރި ދާއިރާއެއްގައި 10 އަހަރުގެ ތަޖުރިބާ ލިބިފައިވުން ހިމެނެއެވެ. މީގެ އިތުރުން، ޤައުމީ އަދި ބައިނަލްއަޤްވާމީ ފެންވަރުގައި މަސައްކަތްކޮށް، ސިޔާސަތު ކަނޑައެޅުމާއި ހިންގުމުގެ ތަޖުރިބާ ހުރުންވެސް ޝަރުޠުތަކުގެ ތެރޭގައި ހިމެނެއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ އިޤްތިޞާދީ ދާއިރާ އިޞްލާޙުކުރުމަށް ގިނަ ފިޔަވަޅުތަކެއް އެޅުމަށް ނިންމާފައެވެ. މީގެ ތެރޭގައި ދައުލަތުގެ ކުންފުނިތައް އެއްކޮށްލުމާއި، ބައެއް ތަންތަން އުވާލުމާއި، ސަބްސިޑީ ދިނުމުގެ އުޞޫލު އިޞްލާޙުކުރުމާއި، އާސަންދައިގެ ޚިދުމަތް ދިނުމުގެ އުޞޫލު އިތުރަށް ހަރުދަނާކުރުން ފަދަ ކަންކަން ހިމެނެއެވެ.
