އަންހެނުން ބާރުވެރިކުރުވުމަކީ ވިލުންތެރި މުޖުތަމަޢެއް ބިނާކުރުމަށް ކޮންމެހެން ކުރަންޖެހޭ ކަމެއް ކަމަށް ރައީސުލްޖުމްހޫރިއްޔާގެ ނައިބުގެ އަނބިކަނބަލުން އައިޝަތު އަފްރީން މުޙައްމަދު ވިދާޅުވެއްޖެއެވެ.
އަފްރީން މިހެން ވިދާޅުވެފައިވަނީ "އެމްޕަވަރިންގ ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޯރމޭޝަން" ގެ ނަމުގައި ތަމްރީން ޕްރޮގްރާމެއް ފެށުމަށް އިއްޔެ ބޭއްވި ރަސްމިއްޔާތުގައެވެ. މި ޕްރޮގްރާމަކީ އިޤްތިޞާދީގޮތުން ބާރުވެރިވެފައިވާ އަންހެނުން އިތުރުކޮށް، އެ ފަރާތްތަކުގެ ވިޔަފާރި ކުރިއަރުވައި ފުޅާކުރުމަށް ކުރިއަށްގެންދާ ޕްރޮގްރާމެކެވެ.
ރަސްމިއްޔާތުގައި ވާހަކަފުޅު ދައްކަވަމުން އަފްރީން ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރުގައި މިންތީގެ ހަމަހަމަކަން ޤާއިމްކުރުމަކީ މުހިންމު ސިޔާސަތެއް ކަމަށެވެ. އަދި 2030 ވަނަ އަހަރާއި ހަމައަށް ފަންނިއްޔާތުގެ ދާއިރާ އިޤްތިޞާދުގައި ހިއްސާކުރާ މިންވަރު 15 އިންސައްތަ އިތުރުކުރުމަށް ސަރުކާރުން މަސައްކަތް ކުރަމުންދާ ކަމަށް ވެސް އެކަމަނާ ފާހަގަ ކުރެއްވިއެވެ.
Advertisement
"ރާއްޖޭގައި ވިޔަފާރިކުރާ އަންހެނުން އިތުރުވަމުން އަންނައިރު، ވިޔަފާރިތަކުގައި ފަންނިއްޔާތު ބޭނުންކުރާ މިންވަރު އިތުރުކޮށްގެން ގިނަ ކުރިއެރުންތަކެއް ހޯދޭނެ," އަފްރީން ވިދާޅުވިއެވެ. އަދި ރާއްޖޭގެ ހުރިހާ ކަންކޮޅަކަށް ވެސް އިންޓަނެޓް ޚިދުމަތް ފޯރުކޮށްދެވޭތީ، ޚިދުމަތްތައް ދިނުމުގައި ބޮޑެތި ފަސޭހަތަކެއް ލިބޭނެކަމަށް އެކަމަނާ ފާހަގަކުރެއްވިއެވެ.
އަފްރީން އިތުރަށް ވިދާޅުވީ، އަންހެނުން ބާރުވެރިކުރުވުމަކީ ހަމައެކަނި އިޤްތިޞާދީ ވިސްނުމަކުން ކުރަންޖެހޭ ކަމެއް ނޫން ކަމަށާއި، މުޅި ޤައުމަށް އޭގެ ފައިދާކުރާނެ ކަމެއްގެ ގޮތުގައި ދެކި އެކަން ކުރަންޖެހޭ ކަމަށެވެ. އަދި އަންހެނުން ބާރުވެރިވުމުން މުޖުތަމަޢުގައި އަންހެނުން އަދާކުރާ ދައުރު ފުޅާވެ، އިޖުތިމާޢީ ގިނަ ކުރިއެރުންތަކެއް ލިބިގެންދާނެ ކަމަށް،ވެސް އެކަމަނާ ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ އަނބިކަނބަލުން އަފްރީން ނިންމާލަމުން ގޮވާލެއްވީ، ލިބިފައިވާ ޓެކްނޮލޮޖީގެ ލުއިފަސޭހަތައް ބޭނުންކޮށް، އީޖާދީ ވިސްނުމާއެކު އަންހެނުންގެ ވިޔަފާރިތައް ކުރިއެރުވުމަށެވެ.
