ޕަބްލިކް ސަރވިސް މީޑިޔާ (ޕީއެސްއެމް) ގެ ޗެނެލްތަކުން ގެނެސްދިން ކޮންޓެންޓެއްގައި ކީރިތި ޤުރުއާނުގެ ބައެއް އުނިވެގެން ދިޔަ މައްސަލައާ ގުޅޭ ގޮތުން އެ ކުންފުނިން އެކަން ވީގޮތް އޮޅުންފިލުވައިދީފިއެވެ.
ޕީއެސްއެމްގެ މެނޭޖިންގ ޑިރެކްޓަރ މުޙައްމަދު ސަޢީދު ވިދާޅުވި ގޮތުގައި، މިކަން ހިނގާފައިވަނީ ކޮންޓެންޓް އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލުކުރުމުގެ ތެރޭގައެވެ. އެމްޑީ ވިދާޅުވީ މިއީ އާންމު ގޮތެއްގައި ކުރާ ކަމެއް ނަމަވެސް، މި ފަހަރު ބަދަލުކުރެވިފައިވަނީ ކީރިތި ޤުރުއާން ކިޔަވަމުންދަނިކޮށް ކަމަށެވެ.
"ލައިވްކޮށް ގެނެސްދޭ ޕްރޮގްރާމެއްގެ ސިގްނަލް، އެއް ކޮންޓްރޯލް ރޫމުން، އަނެއް ކޮންޓްރޯލް ރޫމަށް ބަދަލުކުރުމަކީ، ޢާއްމުގޮތެއްގައި ކުރާކަމެއް. އެހެންނަމަވެސް، އެފަދަ ހާލަތްތަކުގައި ސިގްނަލް ބަދަލުކުރަނީ، މީހަކު ވާހަކަ ދައްކާ ގަޑިއެއްގައި ނޫން. އެހެންނަމަވެސް، މި ދެންނެވި ކޮންޓެންޓް، އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލުކުރެވުނީ، ކީރިތި ޤުރުއާން ކިޔަވަމުން ދަނިކޮށް." މުޙައްމަދު ސަޢީދު ވިދާޅުވިއެވެ.
Advertisement
މި މައްސަލަ ވަރަށް ސީރިއަސްކޮށް ބަލަމުންދާ ކަމަށާއި، ކުންފުނީގެ އިސް މުވައްޒަފުން ހިމެނޭ ކޮމިޓީއަކުން މިހާރު މި މައްސަލަ ބަލަމުންދާ ކަމަށް ޕީއެސްއެމްއިން ބުނެފައިވެއެވެ. އަދި މި ހާދިސާ ހިނގި ވަގުތު ކޮންޓްރޯލް ރޫމްގައި ތިބި މުވައްޒަފުން މިހާރު ވަނީ އެމީހުންގެ މަސައްކަތުން އެކަހެރިކުރެވިފައެވެ.
މީގެ އިތުރުން، މި މައްސަލަ ބެލުމަށް މޯލްޑިވްސް ބްރޯޑްކާސްޓިންގ ކޮމިޝަނަށް ސިޓީއެއް ފޮނުވާފައިވާ ކަމަށާއި، މިފަދަ ކަމެއް ތަކުރާރުނުވާނެ ގޮތަށް ކަންކަން އިންތިޒާމްކުރަމުންދާ ކަމަށް ޕީއެސްއެމްއިން ބުނެފައިވެއެވެ.
ޕަބްލިކް ސަރވިސް މީޑިޔާގެ ޗެނެލްތަކުން ގެނެސްދިން ކޮންޓެންޓެއްގައި ކީރިތި ޤުރުއާންގެ ބައެއް އުނިވެފައިވާތީ، އެކަމަށް ކުންފުނީގެ ފަރާތުން ވަނީ މަޢާފަށް އެދިފައިވެއެވެ.
