ކޮންޓްރެކްޓް ނިމުމުން މެންޗެސްޓަރ ސިޓީގެ ކޯޗް ޕެޕް ގާޑިއޯލާ ރިޓަޔަރކުރުމަށް ވިސްނަމުންދާ ކަމަށް ބުނެ ދެކެވޭ ވާހަކަތައް ގިނަވަމުން އަންނަ ކަމަށް ބައެއް މީޑިއާތަކުން ރިޕޯޓް ކޮށްފައި ވެއެވެ.
މި ވާހަކަތައް ދެކެވެމުން އަންނަނީ މެންޗެސްޓަރ ސިޓީގެ ފޯމް ދަށްވެ، ވޭތުވެދިޔަ 10 މެޗުން 7 މެޗު ބަލިވެފައިވާ ދަނޑިވަޅެއްގައެވެ. އެންމެ ފަހުން ކުޅުނު ޗެމްޕިއަންސް ލީގުގެ މެޗުގައި ރޭ އިޓަލީގެ ޔުވެންޓަސްއާ ކުރިމަތިލި ސިޓީ ވަނީ 2-0 އިން ބަލިވެފައެވެ.
ނަމަވެސް، މި ދަތި ދަނޑިވަޅުގައިވެސް ގާޑިއޯލާ ދަނީ އުއްމީދު ގެއްލުވާނުލައި ޓީމުގެ ކުޅުމާ މެދު ހިތްހަމަޖެހޭ ކަމަށް ބުނަމުންނެވެ. ޔުވެންޓަސްއާ ކުރިމަތިލި މެޗަށްފަހު ގާޑިއޯލާ ބުނެފައިވަނީ ޓީމުގެ ކުޅުން ވަރަށް ރަނގަޅު ކަމަށާއި، ކުޅުންތެރިންނާ މެދު ފަޚުރުވެރިވާ ކަމަށެވެ.
Advertisement
"އަޅުގަނޑުމެން ކުޅުނީ ވަރަށް ރަނގަޅަށް، ހަގީގަތުގައިވެސް ވަރަށް ރަނގަޅަށް. އެންމެ ފަހުގެ ޕާހާއި އެކްޝަން މަދުވި ނަމަވެސް، މި ކުޅުންތެރިންނާ މެދު އަޅުގަނޑު ވަރަށް ފަޚުރުވެރިވޭ. އެމީހުން ހުރިހާ އެއްޗެއް ދިނީ،" ގާޑިއޯލާ ބުނެފައިވެއެވެ.
ސިޓީގެ ކުޅުންތެރި އިލްކޭ ގުންދޯގަން ވަނީ ޓީމުގެ ކުޅުމާ މެދު ހިތްހަމަނުޖެހޭ ކަމަށް ބުނެފައެވެ. އޭނާ ބުނެފައިވަނީ ކޮންމެ ހަމަލާއަކުން ވެސް ނުރައްކާވާ ކަމަށާއި، ޑުއެލްތަކުގައި ފަރުވާކުޑަވާ ކަމަށެވެ.
މިހާރު ސިޓީ ވަނީ ޗެމްޕިއަންސް ލީގުގެ ތާވަލުގައި 22 ވަނައިގައެވެ. އަދި ކުރިއަށް އޮތް ދެ މެޗުން ޕޮއިންޓް ނުލިބިއްޖެ ނަމަ، މުބާރާތުގެ ދެން އޮންނަ ބުރަށް ނުގޮސް ބޭރުވުމުގެ ނުރައްކާ އެބައޮތެވެ.
ގާޑިއޯލާ މިހާރު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެހެންނަމަވެސް އޭނާ މިހާރު ވަނީ އިތުރު އެއް އަހަރަށް އެއްބަސްވުން އައުކުރުމަށް އެއްބަސްވެފައެވެ. އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.
ގާޑިއޯލާ މެންޗެސްޓަރ ސިޓީއާ ހަވާލުވީ 2016 ވަނަ އަހަރުއެވެ. އޭގެ ފަހުން އޭނާގެ އިރުޝާދުގެ ދަށުން ސިޓީން ވަނީ 490 މެޗު ކުޅެފައެވެ. އޭގެ ތެރެއިން 353 މެޗުން މޮޅުވެފައިވާއިރު، 70 މެޗު އެއްވަރުވެ، 67 މެޗުން ބަލިވެފައިވެއެވެ.
ގާޑިއޯލާގެ އިރުޝާދުގެ ދަށުން މެންޗެސްޓަރ ސިޓީން ވަނީ 18 ތަށި ހޯދާފައެވެ. އޭގެ ތެރޭގައި ހަ ފަހަރު ޕްރިމިއާ ލީގު ކާމިޔާބުކުރުމާއި، ފުރަތަމަ ފަހަރަށް ޗެމްޕިއަންސް ލީގު ކާމިޔާބުކުރުން ހިމެނެއެވެ. މީގެ އިތުރުން އެފްއޭ ކަޕާއި ކަރަބޯ ކަޕް އަދި ފީފާ ކުލަބު ވޯލްޑް ކަޕް ވެސް ކާމިޔާބުކޮށްފައިވެއެވެ.
އުމުރުން 43 އަހަރުގެ ގާޑިއޯލާ މެންޗެސްޓަރ ސިޓީއާ ހަވާލުވުމުގެ ކުރިން ޖަރުމަނުގެ ބަޔާން މިއުނިކްގެ ކޯޗުކަން ކުރިއެވެ. އިނގިރޭސިވިލާތަށް އައިފަހުން އޭނާގެ އިރުޝާދުގެ ދަށުން މެންޗެސްޓަރ ސިޓީ ވަނީ އިނގިރޭސި ފުޓުބޯޅައިގެ އެންމެ ކާމިޔާބު ޓީމުތަކުގެ ތެރެއިން އެއް ޓީމަކަށް ވެފައެވެ.
