މިއަދު ހެނދުނު ހައުސިންގ މިނިސްޓްރީ އިމާރާތުގައި ރޯވި އަލިފާންގަނޑުގެ ސަބަބުން އެ ސަރަހައްދުގައި ދިރިއުޅެމުންދާ ފަރާތްތައް ވަގުތީ ގޮތުން ސޯޝަލް ސެންޓަރަށް ބަދަލުކުރުމުގެ މަސައްކަތް ފަށައިފިއެވެ.
އެންޑީއެމްއޭއިން ބުނީ، އަލިފާނުގެ ހާދިސާއާ ގުޅިގެން އެ ސަރަހައްދުގައި ދިރިއުޅޭ ފަރާތްތައް ސޯޝަލް ސެންޓަރަށް ބަދަލުކުރުމުގެ މަސައްކަތް ފަށާފައިވާ ކަމަށެވެ. މިވަގުތުވެސް އެ ސަރަހައްދުގެ ގެތަކަށް ދުމުގެ އަސަރު ކުރަމުންދާ ކަމަށް އެންޑީއެމްއޭއިން ބުންޏެވެ.
އެންޑީއެމްއޭއިން އިތުރަށް ބުނީ، މި ކަމާ ގުޅިގެން ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ޤާއިމްކޮށްފައިވާ ކަމަށެވެ. އަދި އެތަނުގައި ދިވެހި ރެޑް ކްރެސެންޓާއި އެންޑީއެމްއޭގެ ފަރާތްތައް މިހާރު ހަރަކާތްތެރިވަމުންދާ ކަމަށްވެސް އެންޑީއެމްއޭއިން ބުންޏެވެ.
Advertisement
އެއްވެސް އެހީތެރިކަމެއް ބޭނުންވާ ފަރާތެއް ވާނަމަ 115 އަށް ގުޅައި ސެންޓަރަށް ވަޑައިގަތުމަށް އެންޑީއެމްއޭއިން އެދިފައިވެއެވެ.
މިއަދު ހެނދުނު ރޯވި އަލިފާންގަނޑު މި ޚަބަރު ތައްޔާރުކުރެވުނު އިރުވެސް އަދި ކޮންޓްރޯލް ނުވާކަން ފާހަގަކުރެވެއެވެ. އަލިފާން ނިއްވުމުގެ މަސައްކަތް ކުރިއަށްދާއިރު، ރައްޔިތުންގެ ރައްކާތެރިކަމަށްޓަކައި އަޅަންޖެހޭ ފިޔަވަޅުތައް އަޅަމުންދާކަން އިސް އިދާރާތަކުން ފާހަގަކުރެއެވެ.
