ދެކުނު ކޮރެއާގެ ރައީސް ޔޫން ސޫކް-ޔޯލް މަޤާމުން ވަކިކުރުމަށް އެ ޤައުމުގެ ޤާނޫނުހަދާ މަޖިލީހުގައި ނެގި އިތުބާރު ނެތްކަމުގެ ވޯޓުން އޭނާ ސަލާމަތްވެވަޑައިގެންފިއެވެ. މި ވޯޓާ ގުޅިގެން އެ ޤައުމުގެ ސިޔާސީ މަޝްރަޙު އިތުރަށް ހަލަބޮލިވެ، ޑިމޮކްރަސީގެ ހަމަތަކާމެދު ސުވާލު އުފެދިފައިވެއެވެ.
ހޮނިހިރު ދުވަހު ބޭއްވުނު މަޖިލީހުގެ ޖަލްސާގައި، ރައީސް ޔޫންގެ އަމިއްލަ ޕާޓީ ކަމުގައިވާ ޕީޕަލް ޕަވަރ ޕާޓީ (ޕީޕީޕީ)ގެ މެންބަރުން ވޯޓު ބޮއިކޮޓް ކުރުމާއި ގުޅިގެން، އިތުބާރު ނެތްކަމުގެ ވޯޓު ފާސްވުމަށް ބޭނުންވާ 200 ވޯޓު ހަމަނުވެ، އެ ހުށަހެޅުން ވަނީ ބާޠިލުވެފައެވެ. ވޯޓުގައި ބައިވެރިވެފައިވަނީ އެންމެ 195 މެންބަރުންނެވެ.
މި ކަމާއި ގުޅިގެން އިދިކޮޅު ޑިމޮކްރަޓިކް ޕާޓީން ބުނެފައިވަނީ ރައީސް ޔޫންގެ އިތުބާރު ނެތްކަމުގެ މައްސަލަ އަލުން މަޖިލީހުގެ ތަޅުމަށް ވައްދާނެ ކަމަށެވެ. އެހެންނަމަވެސް، ޕީޕީޕީން ބުނެފައިވަނީ 2016 ވަނަ އަހަރު ކުރީގެ ރައީސް ޕާކް ގުން-ހޭ މަޤާމުން ދުރުކުރި ގޮތަށް ރައީސް ޔޫން މަޤާމުން ދުރުކުރުމަށް ފުރުޞަތު ނުދޭނެ ކަމަށެވެ.
Advertisement
މި ހާދިސާ ހިނގާފައިވަނީ ރައީސް ޔޫން ކުއްލި ހާލަތު އިޢުލާނުކުރެއްވުމާ ގުޅިގެން އުފެދުނު ސިޔާސީ ހަލަބޮލިކަމުގެ ތެރެއިންނެވެ. ޑިސެންބަރު 3 ވަނަ ދުވަހު އިޢުލާނުކުރެއްވި ކުއްލި ހާލަތު، އަމިއްލަ ޕާޓީގެ ބައެއް މެންބަރުންގެ ވެސް އިދިކޮޅުވުމާއެކު، 6 ގަޑިއިރުގެ ތެރޭގައި ބާޠިލުކުރައްވަން ޖެހިވަޑައިގަތެވެ.
ރައީސް ޔޫން ވަނީ ކުއްލި ހާލަތު އިޢުލާނުކުރެއްވި ކަމަށްޓަކައި ޤައުމުގެ ރައްޔިތުންގެ ކިބައިން މަޢާފަށް އެދިވަޑައިގެންފައެވެ. ނަމަވެސް މަޤާމުން އިސްތިޢުފާ ދެއްވުމަށް ގޮވާލަމުންދާ ގޮވާލުންތަކަށް އިޖާބަ ނުދެއްވާނެ ކަމަށް އިޝާރާތްކުރައްވައި، އެ ނިންމުން ނިންމާނީ އޭނާގެ ޕާޓީން ކަމަށް ވިދާޅުވެފައި ވެއެވެ.
މި ހާދިސާ އާއި ގުޅިގެން، އޭޝިޔާގެ ހަތަރުވަނައަށް އެންމެ ބޮޑު އިޤްތިޞާދު އަދި އެމެރިކާގެ މައި އަސްކަރީ ބައިވެރިއެއް ކަމަށްވާ ދެކުނު ކޮރެޔާގެ ޑިމޮކްރަސީގެ ހަމަތަކާއިމެދު ސުވާލު އުފެދި، އެ ޤައުމު ވަނީ ފާއިތުވި ދިހަ އަހަރުދުވަހު ކުރިމަތިނުވާ ވަރުގެ ސިޔާސީ ކާރިޘާއަކާއި ކުރިމަތިލާން ޖެހިފައެވެ.
ރައީސް ޔޫންގެ ފަސް އަހަރުގެ ރިޔާސީ ދައުރު ހަމަވުމުގެ ކުރިން އޭނާ އިސްތިޢުފާ ދެއްވައިފި ނަމަ ނުވަތަ މަޤާމުން ދުރުކޮށްފި ނަމަ، ދެކުނު ކޮރެޔާގެ ޤާނޫނު އަސާސީގައިވާ ގޮތުން 60 ދުވަހުގެ ތެރޭގައި ރިޔާސީ އިންތިޚާބެއް ބާއްވަންޖެހޭނެއެވެ.
