ދިވެހިރާއްޖޭގައި ބާއްވާ އެކައުންޓިން ދާއިރާގެ އެންމެ ބޮޑު ފޯރަމްކަމަށްވާ "އައިއެފްއާރުއެސް އެންޑް އައިއެސްއޭ ފޯރަމް" މިމަހު 14 ވަނަ ދުވަހު ފެށުމަށް ހަމަޖެހިފައިވާކަމަށް އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް، ސީއޭ މޯލްޑިވްސްއިން އިޢުލާން ކުރައްވައިފިއެވެ.
ސީއޭ މޯލްޑިވްސްގެ ރައީސް މުޙައްމަދު ޙަލީމް ޢަބްދުﷲ ވިދާޅުވިގޮތުގައި މި ފޯރަމްގައި އިންޓަނޭޝަނަލް ފައިނެންޝިއަލް ރިޕޯޓިން ސްޓޭންޑަޑްސްއާއި އިންޓަނޭޝަނަލް ސްޓޭންޑަޑްސް އޮން އޮޑިޓިންއާގުޅޭ އެންމެ ފަހުގެ މަޢުލޫމާތުތައް ހިއްސާ ކުރެވޭނެއެވެ. އަދި ބޭރު ޤައުމުތަކުގެ އެކައުންޓިންގެ ދާއިރާގެ ތަޖުރިބާކާރުން ފޯރަމްގައި މަޢުލޫމާތުދީ ތަމްރީން ސެޝަންތައް ނަގައިދޭނެ ކަމަށްވެސް އެމަނިކުފާނު ވިދާޅުވިއެވެ.
"މި ފޯރަމްގައި އެކައުންޓިން ދާއިރާގައި މަސައްކަތްކުރާ ފަރާތްތަކުން ބައިވެރިވުން ވަރަށް މުހިންމު. ވިޔަފާރިތަކާއި އެކައުންޓިން ދާއިރާގައި މަސައްކަތްކުރާ ފަރާތްތަކުގެ އެއްބާރުލުން ލިބޭ މި ފޯރަމަށް." ސީއޭ މޯލްޑިވްސްގެ ރައީސް ޙަލީމް ވިދާޅުވިއެވެ.
Advertisement
މި ފޯރަމް އޮންނާނީ މިމަހު 14 އިން 15 އަށް، ޢުމަރު ޒާހިރު ބިލްޑިންގައެވެ. މި ފޯރަމަށް 300 އެއްހާ މީހުން ވަނީ ރެޖިސްޓްރީވެފައެވެ. މިއަހަރަކީ ސީއޭ މޯލްޑިވްސްއިން މި ފޯރަމް ބާއްވާ 3 ވަނަ އަހަރެވެ. ފުރަތަމަ ފަހަރަށް ބާއްވާފައިވަނީ 2022 ވަނަ އަހަރުއެވެ.
އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް އަކީ ރާއްޖޭގެ އެކައުންޓަންސީ ޕްރޮފެޝަނާގުޅޭ ކަންކަން، ބައިނަލްއަޤްވާމީ އުސޫލުތަކާއި ހަމަތަކާއި އެއްގޮތްވާ ގޮތުގެމަތިން، ރާއްޖޭގައި އެކައުންޓަންސީގެ ޕްރޮފެޝަނެއް ޤާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި 2020 ވަނަ އަހަރު އުފައްދާފައިވާ އިންސްޓިޓިއުޓެކެވެ.
