ރ. އުނގޫފާރު މަގެއްގައި އޮތް ފެންގަނޑަކަށް ކަަރަންޓް އައުމުން ދެ ކުއްޖަކު ސަލާމަތް ކުރަން އުޅެނިކޮށް ކަރަންޓުގައި ޖެހި ހާލު ސީރިއަސްވި 18 އަހަރުގެ ޒުވާނާއަށް އިތުރު ފަރުވާ ދިނުމަށް މާލެ ގެނެސްފި އެވެ. މޫސުން ގޯސް މި ދުވަސްވަރުގައި އުނގޫފާރަށް ވެސް ކުރި ވިއްސާރައިގައި މަގުތަކުގައި ފެން ހެދުނެވެ. އޭގެ ތެރެއިން ފެންގަނޑަކަށް ކަރަންޓް އައީ އެތަނުގައި ހުރި ހޮޅިދަނޑިއަކަށް ގުޅާފައި ހުރި ކޭބަލަކުންނެވެ. އޭރު އެ ފެންގަނޑުގައި ދެ ކުއްޖަކު ކުޅެން އުޅުނެވެ.
  •     އެ ހާދިސާގައި އެ ދެ ކުދިންނަށް ވެސް އަނިޔާވި ނަމަވެސް ބޮޑުވަރުވީ، އެ ކުދިން ސަލާމަތް ކުރަން ނުކުތް ހުސެން އަތީކަށް
  •     އޭނާގެ ހާލު ސީރިއަސްވީ އެ ކުދިން ސަލާމަތް ކުރަން އުޅުމުގެ ތެރޭގައި އޭނާއަށް ކަރަންޓު ހޮޅިދަނޑީގައި އަތްލެވުމުން
އަތީކުގެ އާއިލާގެ މީހަކު ބުނިގޮތުގައި ހާދިސާ ހިނގި ވަގުތު އޭނާ އިނީ އާއިލާގެ މީހެއްގެ ގޭގަ އެވެ. ކުޑަކުއްޖަކު ރޮއެގެން އަޑަށް ބޭރަށް ނުކުތް އިރު އަށް އަހަރުގެ ފިރިހެން ކުއްޖަކު، ފެންގަނޑުތެރޭގައި ވެއްޓިފައި އޮތް ކަމަށާއި އެކަމަކު އެ ކުއްޖާ ސަލާމަތް ކުރަން އުޅުމުގެ ތެރޭގައި އަތީކަށް ގޮސް އަތްލެވުނީ ހޮޅިދަނޑީގައި ކަމަށް އޭނާ ބުންޏެވެ.ޒުވާނާގެ އާއިލާއިން ވާހަކަ ދެއްކި މީހާ ބުނިގޮތުގައި:
  •     އަތީކް އޮތީ ވަރަށް ބޮޑަށް ދުޅަވެ ސިފަ ގެއްލިފައި. އެއީ ކާކު ކަމެއް ވެސް ފުރަތަމަ ނޭނގުނު.
  •     ފުއްޕާމެ އާއި އެތެރެހަށީގެ ގިނަ ގުނަވަންތަކަކަށް ވަރަށް ބޮޑަށް ގެއްލުން ލިބުނު
ރެއާ ހަމައަށް އޭނާއަށް ފަރުވާ ދެމުން ދިޔައީ އުނގޫފާރު ހޮސްޕިޓަލުގެ އައިސީޔޫގައި ބާއްވައިގެންނެވެ. ހާލަތުު ގޯސްވަމުން ދިޔުމާއެކު އިތުރު ފަރުވާ ދިނުމަށް އޭނާ މާލެ ގެނައީ ސީއެމްބިއުލާންސްގަ އެވެ."އަދިވެސް ވަރަށް ކްރިޓިކަލް. މާލެ ފޮނުވާލީ ވެސް މެޝިނުން ނޭވާ ލައްވަމުން،" އުނގޫފާރު މީހަކު ބުންޏެވެ.މި ހާދިސާގައި ދެން އަނިޔާވި ކުދިންގެ ހާލު މިހާރު ރަނގަޅެވެ.