ރާއްޖެއާ އެކު ފްރީ ޓްރޭޑު އެގްރިމެންޓެއް ހަދަން އިންޑިއާ އިން ބޭނުންވާ ކަމަށާއި އެގައުމުން އިސްވެ އެ ހުށަހެޅުން ހުށަހަޅާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.ވީ ކިހިނެއް؟ - މިއަދު އިކޮނޮމިކް މިނިސްޓްރީ އިން ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ އިންޑިއާއާއެކު ބޭއްވި މަޝްވަރާތަކުގައި އެފަދަ އެއްބަސްވުމެއް އޮންނަން އިންޑިއާ އިން ބޭނުންވާކަން އެގައުުމުން ހާމަކޮށްފައިވާ ކަމަށެވެ.ބުނީ ކީކޭ؟ - "އެބޭފުޅުން ބޭނުންވޭ އެފަދަ އެގްރިމެންޓެއް އޮންނަން ވަކިން އަދި ސަފްޓާ (ސައުތު އޭޝިއަން ފްރީ ޓްރޭޑް އޭރިއާ) ގެ އިތުރަށް ވެސް. ރައީސް ވަނީ އެ ފުރުސަތު ހުރިހާ ގައުމަކަށް ވެސް ހުޅުވާލާފައި،" ސައީދު ވިދާޅުވި އެވެ.އިންޑިއާ އާއެކު ރާއްޖެއިން ފްރީ ޓްރޭޑު އެއްބަސްވުމެއް ހަދަން އެ ގައުމުން ބޭނުންވާ ކަމަށް މިނިސްޓަރު ވިދާޅުވި އިރު:
- ހާއްސަ ހުއްދައިގެ ދަށުން ޒަރޫރީ ކާބޯތަކެތި ރާއްޖެ އެތެރެ ކުރުމުގެ ހުއްދަ ވެސް އިންޑިއާ އިން ރާއްޖެއަށް ދީފައިއޮވޭ
- އޭގެ ތެރޭގައި ފިޔާ، ބިސް އަލުވި އަދި ކާޑުގެ ބާވަތްތަކާއި މުގު ހިމެނޭ
މިނިސްޓަރު ވިދާޅުވީ ޗައިނާ އާއެކު ކުރީގެ ރައީސް އަބްދުﷲ ޔާމީންގެ ސަރުކާރުގައި ހަދާފައިވާ މިނިވަން ވިޔަފާރީގެ އެއްބަސްވުމަށް އަމަލު ކުރަން ބޭނުންވާ ގާނޫނުތައް ހެދުމުގެ މަސައްކަތް އާ މަޖިލީހުން ކުރާނެ ކަމަށެވެ.މީގެ އިތުރުން ރައީސް މުއިއްޒު ތުރުކީ އަށް ކުރެއްވި ރަސްމީ ދަތުރުފުޅުގައި އެ ގައުމާއެކު ޕްރިފަރެންޝަން ޓްރޭޑު އެގްރިމެންޓަކަށް ދާން އެއްބަސްވެ އޭގެ މަޝްވަރާތައް ނިމުމަކާ ގާތްވެފައިވާ ކަމަށް ސައީދު ވިދާޅުވި އެވެ."އެފްޓީއޭގެ މަސައްކަތް ނިންމާ މި ލެވެނީ 2-3 ބައްދަލުވުމަށް ފަހު. މިއަހަރު ތެރޭ ނިންމާލެވޭނެ،" އޭނާ ވިދާޅުވި އެވެ.މިހާރު ރާއްޖޭން ތުރުކީ އަށް އެކްސްޕޯޓު ކުރާ ކަންނެއްޔާއި މަހުގެ އެހެން ޓެރިފް ގެ ގޮތުގައި ބޮޑު އެއްޗެއް ނަގާ ކަމަށާއި ނަމަވެސް އެއްބަސްވުމާއެކު އެ އަދަދު ކުޑަކުރެވޭނެ ކަމަށް ސައީދު ވިދާޅުވި އެވެ. އަދި ވިދާޅުވީ މަސްއްކަތް ކުރަނީ އެ ޓެރިފް %0 އަށް ކުޑަކުރަން ކަމަށެވެ.މީގެ އިތުރުން ސައީދު ވިދާޅުވީ އިނގިރޭސިވިލާތާއެކު މިހާރު ހަދާފައިވާ ފްރީ ޓްރޭޑު އެގްރިމެންޓުގައި ހުރި ކަންތައްތަކަށްވުރެ ފުޅާ ދާއިރާއިރާއެއްގައި އެގައުމާއެކު ވިޔަފާރި ކުރެވޭނެ އެއްބަސްވުމެއް އެކުލަވާލަން ރައީސް މުއިއްޒު ބޭނުންފުޅުވާ ކަމަށެވެ."އިންވެސްޓުމެންޓުގެ ދާއިރާ، ފައިނޭންޝަލް ސެކްޓާ އިތުރަށް ފުޅާކުރަން ބޭނުންފުޅު ވަނީ. މުޅިން އާ ސްކޯޕެއްގެ ތެރޭގައި އިރާދަ ކުރެއްވިއްޔާ އިނގިރޭސިވިލާތް- ރާއްޖެ ފްރީ ޓްރޭޑު އެރޭންޖުމެންޓު ވެސް ހުޅުވިގެންދާނެ." ސައީދު ވިދާޅުވި އެވެ.
