ފެހުރިހި ހިމާޔަތްކުރުމަށް އައު ގަވާއިދެއް، އަތްލުމާއި ގައިގާ ހިފަހައްޓައިގެން ފެތުން މަނާ

ރާއްޖޭގެ ކަނޑުތަކުގައި އުޅޭ ފެހުރިހި ހިމާޔަތްކުރުން އިތުރަށް ހަރުދަނާ ކުރުމުގެ މަގްސަދުގައި ސަރުކާރުން މުހިންމު ފިޔަވަޅެއް އަޅައިފިއެވެ. މިގޮތުން އެކުލަވާލި އާ ގަވާއިދުގައި ފެހުރިހީގައި އަތްލުން ނުވަތަ ގައިގާ ހިފަހައްޓައިގެން ފެތުން މަނާކޮށްފައިވާކަމަށް މިނިސްޓްރީ އޮފް އެންވަޔަރަންމަންޓުން މިއަދު ހާމަކޮށްފިއެވެ.

މި ގަވާއިދަކީ ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދަށް ގެނައި ހަތްވަނަ އިސްލާހެވެ. މިއާއެކު 2009 ވަނަ އަހަރު އެކުލަވާލި ފެހުރިހި ހިމާޔަތްކުރުމުގެ 'ކޯޑް އޮފް ކޮންޑަކްޓް' މުރާޖައާކޮށް، ފަތުރުވެރިންނާއި ފެހުރިހީގެ ސަލާމަތާއި ރައްކާތެރިކަން ކަށަވަރުކުރުމަށް ހަރުކަށި ގައިޑްލައިންތަކެއް ވަނީ އެކުލަވާލާފައެވެ.

އާ ގަވާއިދުގެ މައިގަނޑު މާއްދާތަކުގެ ތެރޭގައި ފެހުރިހީގެ ހަށިގަނޑުން މަދުވެގެން 3 މީޓަރު އަދި ނިގޫކައިރިން 4 މީޓަރު ދުރުމިނެއް ބެހެއްޓުމަށް އަންގާފައިވެއެވވެއެވެ. އަދި ފެހުރިހީގައި އަތްލުން ނުވަތަ ގައިގާ ހިފަހައްޓައިގެން ފެތުން ވެސް ވަނީ ހަރުކަށިކޮށް މަނާކޮށްފައެވެ.

މީގެ އިތުރުން، ފެހުރިއްސަށް ކާންދިނުމާއި، ފްލޭޝް ފޮޓޯގްރަފީ، ސެލްފީ ސްޓިކް ނުވަތަ އަލިގަދަ ލައިޓް ބޭނުންކުރުންވެސް މަނާކޮށްފައިވެއެވެ. އަދި ޑްރޯން ބޭނުންކޮށްގެން ފޮޓޯނެގުމާއި، އުޅަނދު ދުއްވުމާ ގުޅޭ ޚާއްޞަ ގައިޑްލައިންތަކެއްވެސް މި ގަވާއިދުގައި ހިމަނާފައިވެއެވެ.

ފެހުރިހި ހަރަކާތްތެރިވާ ހިސާބުތަކުގެ ވަށައިގެން 250 މީޓަރުގެ ކޮންޓެކްޓް ޒޯނެއް ކަނޑައަޅައި، އެއްފަހަރާ އެންމެ ގިނައިން ތިން އުޅަނދު ދުއްވޭ ގޮތަށް، ގަޑިއަކު ފަސް ނޯޓްގެ ސްޕީޑް ލިމިޓެއް ތަންފީޒުކޮށްފައިވާކަން މިނިސްޓްރީން ފާހަގަކޮށްފައިވެއެވެ.

މި އާ ގަވާއިދަކީ ރާއްޖޭގެ ކަނޑުގެ ސަރަހައްދާއި ކަނޑުގެ ދިރުންތައް ހިމާޔަތްކުރުމަށް ރާއްޖެއިން ކުރާ މަސައްކަތްތައް އިތުރަށް ހަރުދަނާކުރުމަށް އެޅޭ މުހިއްމު ފިޔަވަޅެއްކަމަށް މިނިސްޓްރީން ބުނެފައިވެއެވެ. އަދި މި ގަވާއިދު ތަންފީޒުކުރުމުން ރާއްޖޭގެ ކަނޑުތަކުގައި އުޅޭ ފެހުރިހީގެ ރައްކާތެރިކަން އިތުރުވެ، ދެމެހެއްޓެނިވި ގޮތެއްގައި ފަތުރުވެރިކަމުގެ ސިނާއަތުގައި ފެހުރިހި ބެލުމުގެ ހަރަކާތްތައް ކުރިއަށް ގެންދެވޭނެކަމަށް އުންމީދުކުރެވެއެވެ.މި ގަވާއިދު ތަންފީޒުކުރަން ފަށާނީ ކުރިއަށް އޮތް މަހުގެ ފުރަތަމަ ދުވަހުން ފެށިގެންކަމަށް މިނިސްޓްރީން ހާމަކޮށްފައިވެއެވެ. އަދި މި ގަވާއިދާ ޚިލާފުވާ ފަރާތްތަކަށް ޖޫރިމަނާ ކުރެވޭނެކަމަށްވެސް ބުނެފައިވެއެވެ. ނަމަވެސް ޖޫރިމަނާގެ ތަފްސީލު މިވަގުތު ހާމަކޮށްފައެއް ނުވެއެވެ.

ފެހުރިހި ހިމާޔަތްކުރުމަށް މި އަޅާ ފިޔަވަޅުތަކާމެދު ގިނަ ފަރާތްތަކުން ވަނީ ތާއީދުކޮށްފައެވެ. ޚާއްޞަކޮށް ތިމާވެށި ހިމާޔަތްކުރުމަށް މަސައްކަތްކުރާ ޖަމްއިއްޔާތަކުން މި ގަވާއިދަށް މަރުހަބާ ކިޔާފައިވެއެވެ. ނަމަވެސް ބައެއް ފަތުރުވެރިކަމުގެ ވިޔަފާރިވެރިން ވަނީ މި ގަވާއިދުގެ ސަބަބުން އެމީހުންގެ ވިޔަފާރިއަށް އަސަރުކުރާނެކަމުގެ ކަންބޮޑުވުން ފާޅުކޮށްފައެވެ.