ރައީސް ޑރ. މުހައްމަދު މުއިއްޒުގެ ޓީމް ރޫޅާ ނުލެވޭނެ ކަމަށާއި، ޓީމް އޮތީ ބަދަހިކޮށްކަން ސްޕެޝަލް އެޑްވައިޒަރ ޓު ދަ ޕްރެސިޑެންޓް އަދި ފޮނަދޫ އިންތިހާބީ މެމްބަރު އަބްދުއްރަހީމް އަބްދުﷲ (އަދުރޭ) ކަށަވަރުކޮށްދެއްވައިފިއެވެ.
މިހާރުވެސް މީސް މިޑިއާގެ އެކި ޕްލެޓްފޯމްތަކުގައި މި ސަރުކާރުގެ އެކިއެކި ކަންކަމާއި އެކިއެކި ބޭފުޅުންނާއި ގުޅޭގޮތުން ތަފާތު ވާހަކަތައް ދައްކަމުންދާއިރު އެކަމާއި ގުޅިގެން އަބްދުއްރަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް މުއިއްޒުގެ ވެރިކަމުގެ ފުރަތަމަ ދުވަހުން ފެށިގެން ދިވެހީންގެ ކުރިމަތީގައި އެ މަނިކުފާނުގެ އަގު ވައްޓާލައި އިތުބާރު ގެއްލުވާލުމަށް ކެނޑިނޭޅި ހަގީގަތާއި ހިލާފު ދޮގު ވާހަކަތައް ފަތުރަމުން ދަނިކޮށް އެ މަނިކުފާނަށް ފުރިހަމަ ތާއީދާ އިތުބާރު އެބަ އޮތްކަން ނިމިދިޔަ މަޖިލިސް އިންތިހާބުގައި ދިވެހީން ނުކުމެ ސާބިތުކޮށްދީފައިވާ ކަމަށެވެ. އަދި އެކަން ބަލައި ނުގަނެވިގެން އެ މަނިކުފާނުގެ ޓީމު ރޫޅާލުމަށް އިތުރަށް ދޮގު ހަބަރުތައް ފަތުރަމުންދާ ކަމަށް އަބްދުއް ރަހީމް ވިދާޅުވެފައި ވެއެވެ.
Advertisement
"އިންޝާﷲ އެ ފަދަ ހަބަރުތައް ފަތުރާ ފަރާތްތައް ފަޟީހަތްވުން ނޫން އިތުރުކަމެއް ހާސިލެއް ނުވާނެ. ރައީސް ޑރ.މުއިއްޒާއެކު ޓީމު އޮތީ ބަދަހިކޮށް. ދިވެހީން ދާނީ މުއިއްޒު ދުވެލީގައި ގައުމައިގެން ކުރިޔަށް،". އަބްދުއް ރަހީމް ވިދާޅުވެފައި ވެއެވެ.
އަބްދުއްރަހީމް އަބަދުވެސް ގެންދަވަނީ އެކި ފަރާތްތަކުން ދައްކަމުންގެންދާ ވާހަކަތަކަށް ރައްދު ދެމުންނެވެ.
