ބައިނަލްއަޤްވާމީ މަޢުލޫމާތު ހޯދައި ލިބިގަތުމުގެ ދުވަސް މިއަދު ފާހަގަކުރެވެމުންދާއިރު، ކޮރަޕްޝަންގެ ޢަމަލުތައް މަދުކުރުމަށް އޮތް އެންމެ މުހިންމު ތަޅުދަނޑިއަކީ މަޢުލޫމާތު ހާމަކުރުން ކަމަށް އިންފޮމޭޝަން ކޮމިޝަމިޝަނަރުގެ އޮފީހުން ބުނެފިއެވެ.
ކޮންމެ އަހަރެއްގެ ސެޕްޓެންބަރު 28 ގައި ފާހަގަކުރާ މި ދުވަހުގެ މަޤްޞަދަކީ މަޢުލޫމާތު ހޯދުމުގެ ޙައްޤު ކަށަވަރުކޮށް، ސަރުކާރުގެ ހާމަކަން އިތުރުކުރުމެވެ. ދުނިޔޭގެ ފެންވަރުގައި މި ދުވަސް ފާހަގަކުރަން ފެށީ 2019 ވަނަ އަހަރުއެވެ.
ރާއްޖޭގައި މަޢުލޫމާތު ހޯދުމުގެ ޙައްޤުގެ ޤާނޫނު ތަންފީޒު ތަޞްދީޤުކުރީ 2014 ވަނަ އަހަރުއެވެ. މި ޤާނޫނާ އެކު އިންފޮމޭޝަން ކޮމިޝަނަރުގެ އޮފީސް އުފެދި، ފުރަތަމަ ކޮމިޝަނަރަކަށް ޢަބްދުލް ޢަޒީޒް ޖަމާލް އަބޫބަކުރު އައްޔަންކުރެވުނެވެ.
Advertisement
ޢަބްދުލްޢަޒީޒްގެ ދައުރުގައި މަޢުލޫމާތު ހޯދުމުގެ ޙައްޤަށް ހޭލުންތެރިކުރުމުގެ ޕްރޮގްރާމްތައް ރާއްޖޭގެ ހުރިހާ އަތޮޅެއްގައި ހިންގުނެވެ. އޭނާ ވިދާޅުވީ މަޢުލޫމާތު ހާމަކުރުމަކީ ރައްޔިތުންގެ އިތުބާރު އިތުރުވެ، ކޮރަޕްޝަން މަދުވެ، ދައުލަތުގެ ހާމަކަން އިތުރުވާނެ ކަމެއް ކަމަށެވެ.
މިހާރުގެ ކޮމިޝަނަރު އަޙްމަދު ޢާހިދު ރަޝީދު ވިދާޅުވީ މަޢުލޫމާތު ހާމަކުރުމަކީ ކަންކަން ރަނގަޅުކުރުމަށް ލިބޭ ބާރެކެވެ. އަދި ކުރިއެރުމަށް ހުޅުވޭ ދޮރަކަށް ވާނެއެވެ.
"މަޢުލޫމާތު ސިއްރުކުރުމަކީ ކޮރަޕްޝަނަށް މަގުފަހިވެ، ރައްޔިތުންގެ އިތުބާރު ގެއްލޭނެ ކަމެކެވެ. އެހެންކަމުން، މަޢުލޫމާތު ހާމަކުރުމަކީ ކޮރަޕްޝަން މަދުކުރުމަށް އޮތް އެންމެ މުހިންމު ތަޅުދަނޑިއެވެ،" އަޙްމަދު ޢާހިދު ރަޝީދު ވިދާޅުވިއެވެ.
މަޢުލޫމާތު ހޯދުމުގެ ޙައްޤަކީ ޚިޔާލު ފާޅުކުރުމުގެ މިނިވަންކަމާ ގުޅުންހުރި، ރައްޔިތުންނަށް ލިބިދޭ މުހިންމު ބާރެއް ކަމަށް އިންފޮމޭޝަން ކޮމިޝަނަރުގެ އޮފީހުން ބުނެއެވެ. މި ޙައްޤު ރައްކާތެރިކޮށް ދެމެހެއްޓުމަކީ ޑިމޮކްރަސީ ހަރުދަނާކޮށް، ހެޔޮ ވެރިކަމެއް ޤާއިމުކުރުމަށް ކޮންމެހެން ބޭނުންވާ ކަމެއް ކަމަށްވެސް އެ އޮފީހުން ބުނެއެވެ.
