ޖަޕާނުގައި ދަނޑުވެރިކަމުގެ ދާއިރާއިން މާސްޓަރސް ޑިގްރީ އަދި ޕީއެޗްޑީ ހެދުމަށް 40 ފުރުސަތު ހުޅުވާލައިފައެވެ.
މަތީ ތަޢުލީމާއި، މަސައްކަތްތެރިކަމާއި އަދި ހުނަރުވެރިކަން ތަރައްޤީކުރުމުގެ ވުޒާރާއިން ބުނީ މި ސްކޮލަރޝިޕް ފުރުސަތުތައް ދެވެނީ ޖައިކާގެ "އެގްރިކަލްޗަރ ސްޓަޑީޒް ނެޓްވޯކް ފޯ ފުޑް ސެކިއުރިޓީ 2025" ގެ ދަށުން ކަމަށެވެ.
މަތީ ތަޢުލީމުގެ ވުޒާރާއިން މަޢުލޫމާތު ދީފައިވާ ގޮތުގައި، މި ފުރުސަތުތަކުގެ މަޤްޞަދަކީ ދަނޑުވެރިކަމުގެ ދާއިރާގައި ތަޢުލީމީ އަދި ތަޖުރިބާކާރު މީހުންގެ އަދަދު އިތުރުކުރުމެވެ.
Advertisement
އެ ވުޒާރާއިން ބުނީ މާސްޓަރސް ޑިގްރީ ހެދުމަށް ޝައުޤުވެރިވާ ފަރާތްތަކުގައި ގުޅުންހުރި ދާއިރާއަކުން ބެޗްލަރސް ޑިގްރީއެއް ހާސިލުކޮށްފައި ވާންވާނެ ކަމަށެވެ. އަދި 1 އޭޕްރިލް 2025 ގެ ނިޔަލަށް އުމުރުން 35 އަހަރު ފުރިފައި ނުވާ ފަރާތަކަށް ވާންޖެހޭ ކަމަށް ވުޒާރާއިން ބުނެއެވެ.
މީގެ އިތުރުން، ޕީއެޗްޑީ ހެދުމަށް ޝައުޤުވެރިވާ ފަރާތްތަކުގައި ގުޅުންހުރި ދާއިރާއަކުން މާސްޓަރސް ޑިގްރީއެއް ހާސިލުކޮށްފައި ވާންވާނެއެވެ. އަދި އޭޕްރިލް 2025 ގެ ނިޔަލަށް އުމުރުން 40 އަހަރު ފުރިފައި ނުވާ މީހަކަށްވާން ޖެހޭނެ ކަމަށް ވުޒާރާއިން ބުންޏެވެ.
މި ފުރުސަތުތަކަށް އެދި ހުށަހެޅުމުގެ ސުންގަޑިއަކީ 26 ސެޕްޓެމްބަރު 13:30 ކަމަށް ވުޒާރާއިން ވަނީ ހާމަކޮށްފައެވެ. އަދި މި ފުރުސަތުތަކާ ބެހޭ އިތުރު މަޢުލޫމާތު ސަރުކާރުގެ ގެޒެޓުންނާއި ވުޒާރާއިން ލިބެން ހުންނާނެ ކަމަށްވެސް ވުޒާރާއިން ވަނީ ބުނެފައެވެ.
މި ފުރުސަތުތަކަކީ ދިވެހިރާއްޖޭގެ ދަނޑުވެރިކަމުގެ ދާއިރާ ކުރިއެރުވުމަށް މުހިންމު ފުރުސަތުތަކެއް ކަމަށް ބެލެވެއެވެ. ޝައުޤުވެރިވާ ފަރާތްތަކުން މި ފުރުސަތުތަކަށް ކުރިމަތިލުމަކީ ދަނޑުވެރިކަމުގެ ދާއިރާއަށް ލިބިގެންދާނެ ވަރަށް ބޮޑު ކުރިއެރުމެއް ކަމުގައި ފާހަގަކުރެވެއެވެ.
