ރާއްޖެ ކުރިއެރުވުމަށް ބޭނުންވާ ބައެއް މުހިންމު ދާއިރާތަކުން ހުނަރުވެރިން އުފެއްދުމަށް އަމާޒުކޮށް، ހުރިހާ ޚަރަދެއް ހަމަޖައްސައިދޭ ހަތަރު ސްކޮލަޝިޕްގެ ފުރުސަތު ދަ ނޯޓިލަސް ފައުންޑޭޝަނުން މިއަދު ހުޅުވާލައިފިއެވެ.
ރާއްޖޭގައި ތަޢުލީމާއި ޕްރޮފެޝަނަލް ޑިވެލޮޕްމަންޓް ކުރިއެރުވުމަށް ޚާއްޞަ ދަ ނޯޓިލަސް ފައުންޑޭޝަނުން ނެރުނު ނޫސްބަޔާނެއްގައި ބުނެފައިވަނީ، މި ސްކޮލަޝިޕްތަކުން ޔަޤީންކޮށްދެނީ ދެމެހެއްޓެނިވި ކުރިއެރުމަށާއި ދުނިޔޭގެ ވާދަވެރިކަމަށް ބޭނުންވާ ހުނަރާއި އިލްމު ދިވެހި ޒުވާނުންނަށް ފޯރުކޮށްދިނުމަށް ފައުންޑޭޝަންގެ ދެމިއޮތް ވަޢުދު ކަަމަށެވެ.
މި އަހަރު ސްކޮލަޝިޕްގެ ފުރުސަތު ދޭ ހަތަރު ދާއިރާއަކީ ޑޮކްޓަރީރީކަން (މެޑިސިން)، އެއާކްރާފްޓް އިންޖިނިއަރިންގ، ނޫސްވެރިކަން، އަދި ފަންނީ ކެއްކުމުގެ ދާއިރާއެވެ. މި ދާއިރާތަކުން ކޮންމެ ދާއިރާއަކަށް ވަކި ސްކޮލަޝިޕް ޕްރޮގްރާމެއް ފަރުމާކޮށްފަވެއެވެ.
Advertisement
މެޑިކަލް ސްޕެޝަލައިޒޭޝަން ސްކޮލަޝިޕްގެ މަޤްޞަދަކީ ސިއްޙީ ދާއިރާގެ ފަރާތްތަކަށް ބޭނުންވާ ޚާއްޞަ ތަމްރީނު ހޯދުމުގެ ފުރުސަތު ފަހިކޮށްދީގެން ސިއްޙީ ދާއިރާ ތަރައްޤީ ކުރުމަށް އެހީތެރިވެދިނުމެވެ. އެއާކްރާފްޓް މެއިންޓެނަންސް ލައިސަންސް ޕްރޮގްރާމުން ދަރިވަރުންނަށް އެއާކްރާފްޓް މެއިންޓެނަންސް އިންޖިނިއަރުންގެ ގޮތުގައި ސެޓިފައިވެ، އެ ދާއިރާގައި ކުރިއަށް ދިއުމަށް ބޭނުންވާ ތަމްރީނާއި ތަޖުރިބާ ލިބޭނެއެވެ.
މާސް ކޮމިއުނިކޭޝަންސް އަންޑަގްރެޖުއޭޓް ޑިގްރީ ސްކޮލަޝިޕަކީ ނޫސްވެރިންނާއި މީޑިއާ ޕްރޮފެޝަނަލުން ބާރުވެރިކޮށް، ހާމަކަން ބޮޑު މުޖުތަމަޢެއްގެ ބިންގާ ހަރުދަނާކުރުމަށް ފަރުމާކޮށްފައިވާ ސްކޮލަޝިޕެކެވެ. އަދި ކޮމާޝަލް ކޫކަރީ އިން ސެޓްފިކެޓް ތިނެއްގެ ސްކޮލަޝިޕް ފަރުމާކޮށްފައިވަނީ ރާއްޖޭގެ ފަތުރުވެރިކަމުގެ ދާއިރާގައި ކަލިނަރީ ޕްރޮފެޝަނަލުންނަށް ވުމަށް ޝައުޤުވެރިވާ ފަރާތްތަކަށް އިލްމާއި ޢަމަލީ ތަޖުރިބާ ލިބޭނެ ގޮތަށެވެ.
ނޯޓިލަސް ފައުންޑޭޝަނުން ބުނެފައިވަނީ މި ސްކޮލަޝިޕްތައް ކޮންމެ އަހަރަކު ވެސް ދިނުމަކީ އެ ފައުންޑޭޝަންގެ މަޤްޞަދު ކަމަށެވެ. އޭގެ ބޭނުމަކީ ޒިންމާދާރު ތަޢުލީމީ ދަރިންތަކެއް މުޖުތަމަޢަށް ނެރެދީ، ޤައުމީ ތަރައްޤީގެ ލަނޑުދަނޑިތައް ޙާޞިލުކުރުމުގައި އެހީތެރިކަން ފޯރުކޮށްދިނުން ކަމަށް ވެސް އެ ފައުންޑޭޝަނުން ބުނިއެވެ.
މި ސްކޮލަޝިޕްތަކަށް ޝައުޤުވެރިވާ ފަރާތްތަކުން ނޯޓިލަސް ފައުންޑޭޝަންގެ ވެބްސައިޓުން މަޢުލޫމާތު ސާފުކޮށް، އިރުޝާދު ދީފައިވާ ގޮތަށް އެޕްލިކޭޝަން ހުށަހެޅުމަށް ވަނީ އެދިފައެވެ.
ނޯޓިލަސް ފައުންޑޭޝަނަކީ ޤައުމަށް އަގުހުރި ޚިދުމަތްތަކެއް ކޮށްދެއްވާފައިވާ ޑރ. އިބްރާހީމް މަނިކުގެ ހަނދާނާއި ޒިކުރާ އާކުރުމުގެ ގޮތުން އުފައްދާފައިވާ ޖަމްޢިއްޔާއެކެވެ. މި ފައުންޑޭޝަނުން ކޮންމެ އަހަރަކު ވެސް ތަފާތު ދާއިރާތަކުން ސްކޮލަޝިޕްތައް ހުޅުވާލައި، ދިވެހި ޒުވާނުންނަށް މަތީ ތަޢުލީމު ޙާޞިލުކުރުމުގެ ފުރުޞަތު ފަހިކޮށްދެމުން އަންނަކަން ފާހަގަކުރެވެއެވެ.
މި އަހަރުގެ ސްކޮލަޝިޕްތަކުގެ ތެރެއިން ޚާއްޞަ ސަމާލުކަމެއް ދީފައިވަނީ ރާއްޖޭގެ އިޤްތިޞާދަށް މުހިންމު ދާއިރާތަކަށް ކަމަށްވާތީ، މި ފުރުޞަތުތަކުގެ ސަބަބުން ކުރިއަށް އޮތް އަހަރުތަކުގައި އެ ދާއިރާތަކަށް ބޭނުންވާ ހުނަރުވެރި މީހުން އުފެއްދުމަށް މަގުފަހިވާނެ ކަމަށް ބެލެވެކަމަށް ފައުންޑޭޝަނުން ބުނެއެވެ.
ނޯޓިލަސް ފައުންޑޭޝަނުން މި ފަދަ ފުރުޞަތުތައް ހުޅުވާލުމަކީ ދިވެހި ޒުވާނުންނަށް ބަށް ބޮޑު ހިތްވަރަކަށް ވެގެންދާނެ ކަމެކެވެ. އަދި މިފަދަ ފުރުޞަތުތަކުގެ ސަބަބުން ޤައުމަށް ބޭނުންވާ ދާއިރާތަކުން ތަމްރީނު ލިބިފައިވާ ޒުވާނުން އިތުރުވެ، ޤައުމީ ތަރައްޤީއަށް އިތުރު ބާރެއް ލިބިގެންދާނެއެވެ.
