ދުނިޔެއަށް މިހާރު ބޭނުންވަނީ ހިޔާލީ ވާހަކަތަކެއް ދައްކާ ނިޒާމެއް ނޫން ކަމަށާއި، ކުރިމަތިވެފައިވާ މައްސަލަތަކަށް އަމަލީ ގޮތުން ހައްލު ހޯދައިދޭނެ ނިޒާމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މި ވާހަކަފުޅު ދެއްކެވީ މިއަދު ފެށުނު "ސަމިޓް އޮފް ދަ ފިއުޗަރ" ގެ ހުޅުވުމުގެ ރަސްމިއްޔާތުގައި ތަޤުރީރުކުރައްވަމުންނެވެ . މި ސަމިޓަކީ ދުނިޔޭގެ އެކި ޤައުމުތަކުގެ އިސްވެރިން އެއްތަނަކަށް އެއްވެ، މިހާރު ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށް މަޝްވަރާކޮށް، މުސްތަޤުބަލު ރައްކާތެރިކުރުމަށް އެންމެންގެ ޚިޔާލު ހޯދުމަށް ބޭއްވޭ ދެ ދުވަހުގެ ބައްދަލުވުމެކެވެ.
ރައީސް މުއިއްޒު އިތުރަުރަށް ވިދާޅުވީ މި ސަމިޓްގެ މައިގަނޑު މަޤްޞަދަކީ ބައިނަލްއަޤްވާމީ ފެންވަރުގައި ވެވިފައިވާ އެއްބަސްވުންތަކަށް އަމަލުކުރުން އަވަސްކުރުމާއި، "ޕެކްޓް ފޮރ ދަ ފިއުޗަރ" މެދުވެރިކޮށް އަލަށް ކުރިމަތިވަމުން އަންނަ ގޮންޖެހުންތަކުން އަރައިގަތުމަށް މަސައްކަތްކުރުން ކަމަށެވެ.
Advertisement
މީގެ އިތުރުން، މި ސަމިޓްގައި "ގްލޯބަލް ޑިޖިޓަލް ކޮމްޕެކްޓް" އަދި "ޑެކްލަރޭޝަން އޮން ފިއުޗަރ ޖެނެރޭޝަންސް" ހިމެނޭ ގޮތަށް، 21 ވަނަ ގަރުނުގެ ހަޤީޤަތްތަކުގެ މައްޗަށް ބިނާވެފައިވާ އާ ނިޒާމެއް އެކުލަވާލުމަށްވެސް މަސައްކަތްކުރެވޭނެ ކަމަށް ރައީސް މުއިއްޒު ފާހަގަކުރެއްވިއެވެ.
ރައީސް މުއިއްޒުގެ މި ބަސްފުޅުތަކުން ދޭހަވަނީ، ދުނިޔެއަށް ކުރިމަތިވެފައިވާ ގޮންޖެހުންތަކަށް ހަމައެކަނި ވާހަކަދެއްކުމުގެ ބަދަލުގައި، އަމަލީ ފިޔަވަޅުތަކެއް އެޅުމުގެ މުހިންމުކަމެވެ. އަދި މި ސަމިޓަކީ އެފަދަ އަމަލީ ފިޔަވަޅުތަކެއް އެޅުމަށް މަގުފަހިކޮށްދޭނެ މުހިންމު ފުރުސަތެއް ކަމަށްވެސް ފާހަގަކުރެވެއެވެ.
