ދަނޑުވެރިކަމާއި ބެހޭ ވުޒާރާއިން ދިގު މުއްދަތަކަށް ދަނޑުވެރިކަން ކުރުމަށް ކުއްޔަށް ދޫކޮށްފައިވާ ރަށްތައް މޮނިޓަރ ކުރުމަށްޓަކައި، މި މަހުގެ 18 އިން 20 އަށް، މިނިސްޓްރީގެ ޓީމެއް ދ. އަދި ތ. އަތޮޅުގެ ބައެއް ރަށްތަކަށް ޒިޔާރަތްކޮށްފިއެވެ.
މިނިސްޓްރީން މިއަދު ނެރުނު ޕޯސްޓެއްގައި ބުނެފައިވާ ގޮތުގައި، މި މޮނިޓަރިންގ މަސައްކަތް ކުރިއަށް ގެންގޮސްފައިވަނީ ދ. އަތޮޅުގެ އުއްދޫ އަދި ޅޮހީގައާއި، ތ. އަތޮޅުގެ ދުރުރެހާގައެވެ. މި ދަތުރުގައި މިނިސްޓްރީގެ ބޭފުޅުން ބައިވެރިވެ ވަޑައިގެންނެވިއެވެ.
މި ދަތުރުގެ މައިގަނޑު މަޤްޞަދަކީ ދިގު މުއްދަތަށް ކުއްޔަށް ދޫކޮށްފައިވާ ރަށްތަކުގެ ތަރައްޤީގެ މަސައްކަތްތައް ކުރިއަށްދާ މިންވަރު ބެލުމާއި، އެ ރަށްތަކުގައި ހިންގާ މަޝްރޫޢުތަކުގެ ފެންވަރު ވަޒަންކުރުމެވެ. މީގެ އިތުރުން، ކުއްޔަށް ދޫކޮށްފައިވާ ފަރާތްތަކުން އެއްބަސްވުމުގައިވާ ގޮތުގެ މަތިން ޢަމަލުކުރަމުންދޭތޯ ބެލުމަކީވެސް މި ދަތުރުގެ އެއް މަޤްޞަދެވެ.
