މިއަދު ރާއްޖޭގެ މޫސުން ގޯސްވެ، އެކި ހިސާބުތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށް ގައުމީ މޫސުމާ ބެހޭ އިދާރާ (މެޓް) އިން އިންޒާރު ދީފިއެވެ.
މެޓް އޮފީހުން ނެރުނު ނޫސްބަޔާނެއްގައި ބުނެފައިވަނީ މިއަދު ރާއްޖޭގެ އެކި ހިސާބަށް ވިއްސާރަކުރާނެ ކަމަށް ލަފާ ކުރެވޭ ކަމަށެވެ. އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށް ވެސް ބުނެފައިވެއެވެ.
މީގެ އިތުރުން، ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން އަދި އެހެން ހިސާބުތަކަށް ހުޅަނގާއި ހުޅަނގު އުތުރުން ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ވެސް މެޓް އިން ލަފާކޮށްފައިވެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައި ގަދަވުން އެކަށީގެންވާ ކަމަށް ވެސް އިންޒާރު ދީފައިވެއެވެ.
Advertisement
މެޓް އިން ބުނެފައިވަނީ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށެވެ. އަދި ރާޅުގެ އުސްމިނުގައި 3-6 ފޫޓް ހުންނާނެ ކަމަށް ވެސް ލަފާކޮށްފައިވެއެވެ.
މި ޙާލަތާ ގުޅިގެން، މެޓް އޮފީހުން ރައްޔިތުންނަށް އިލްތިމާސްކޮށްފައިވަނީ މޫސުމުގެ މަޢުލޫމާތު ގަވާއިދުން ބަލަމުން ގެންދިއުމަށާއި، ކަނޑު ދަތުރުފަތުރު ކުރާއިރު ފަރުވާތެރިވުމަށެވެ. އަދި އިމަޖެންސީ ޙާލަތެއްގައި ގުޅަންޖެހޭ ނަންބަރުތައް އަތުގައި ބެހެއްޓުމަށް ވެސް އިރުޝާދު ދީފައިވެއެވެ.
