ދިވެހި ސަރުކާރުގެ ވަފުދެއް ތައިލެންޑުގެ ވޭސްޓް މެނޭޖްމަންޓް ސަޔާމް ފެސިލިޓީއަށް އިއްޔެ ޒިޔާރަތްކޮށްފިއެވެ.
މި ޒިޔާރަތަކީ ކުނި މެނޭޖްކުރުމުގެ ޒަމާނީ އުސޫލުތަކާއި ހުނަރުތައް ދަސްކުރުމަށް ކުރި ދަތުރެކެވެ.
މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ އިސް ބޭފުޅުން ހިމެނޭ މި ވަފުދުން ވަނީ ސަޔާމް ފެސިލިޓީގެ މަސައްކަތްތައް ގާތުން ބަލައި، އެތަނުގެ ހިންގުން ދިރާސާކޮށްފައެވެ. ޚާއްޞަކޮށް އިލެކްޓްރޯނިކް ކުނި ރީސައިކަލްކުރުމުގައި ބޭނުންކުރާ އައު ޓެކްނޮލޮޖީތަކާއި އުކުޅުތަކަށް ވަފުދުން ވަނީ އަހުލުވެރިވެފައެވެ.
Advertisement
ވަފުދުގެ އިސް ބޭފުޅަކު ވިދާޅުވި ގޮތުގައި، މި ދަތުރުން ލިބުނު މަޢުލޫމާތު ދިވެހިރާއްޖޭގައި ކުނި މެނޭޖްކުރުމުގެ ނިޒާމު ހަރުދަނާކުރުމަށް ބޭނުންކުރެވޭނެއެވެ. "އަޅުގަނޑުމެން މި ދަތުރުން ދަސްކުރި ކަންތައްތައް ރާއްޖޭގައި ތަންފީޒުކުރަން މަސައްކަތްކުރާނަން.. ޚާއްޞަކޮށް އިލެކްޓްރޯނިކް ކުނި ނައްތާލުމުގައި ދިމާވާ ގޮންޖެހުންތަކަށް ހައްލު ހޯދުމަށް މި ތަޖުރިބާގެ ބޭނުން ހިފާނަން،" އެބޭފުޅާ ވިދާޅުވިއެވެ.
މިދަތުރަކީ ދިވެހިރާއްޖެއާއި ތައިލެންޑާ ދެމެދު އޮތް ގުޅުން އިތުރަށް ބަދަހިކުރުމަށާއި، ތިމާވެށި ރައްކާތެރިކުރުމުގެ ދާއިރާއިން ތަޖުރިބާ ހިއްސާކުރުމަށް އެޅުނު މުހިންމު ފިޔަވަޅެއްކަމަށްވެސް ވުޒާރާއިން ފާހަގަކޮށްފައިވެއެވެ.
ދިވެހިރާއްޖޭގައި ކުނި މެނޭޖްކުރުމަކީ އަބަދުވެސް ގޮންޖެހުންތަކެއް ހުރި ދާއިރާއެކެވެ. މި ދަތުރުން ލިބުނު މަޢުލޫމާތާއި ތަޖުރިބާގެ އަލީގައި، ރާއްޖޭގެ ކުނި މެނޭޖްކުރުމުގެ ނިޒާމަށް އެދެވޭ ބަދަލުތަކެއް އަންނާނެއެވެ.
