މެދު ރާއްޖެތެރެއާއި ދެކުނަށް ކެރީގެ އަސަރު ފޯރައި ގުގުރުން އެކަށީގެންވޭ

މިއަދު މެދު ރާއްޖެތެރެއާއި ދެކުނަށް ކެރީގެ އަސަރު ފޯރައި ގުގުރުން އެކަށީގެންވާ ކަމަށް ގައުމީ މޫސުމާ ބެހޭ އިދާރާ (މެޓް) އިން އިންޒާރު ދީފިއެވެ.

މިއަދުގެ ހަވީރު 6:00 އަށް މެޓް އިން ނެރުނު މޫސުމީ ލަފާގައި ބުނެފައިވަނީ މެދު ރާއްޖެތެރެއާއި ދެކުނުގެ ބައެއް ރަށްތަކަށް ކެރީގެ އަސަރު ކުރާނެ ކަމަށެވެ. އަދި މި ސަރަހައްދުތަކުގައި ގުގުރުން އެކަށީގެންވާ ކަމަށް ވެސް ވަނީ ލަފާކޮށްފައެވެ. ނަމަވެސް، އުތުރުގެ މޫސުން ރަނގަޅުވާނެ ކަމަށް މެޓް އިން ބުނެފައިވެއެވެ.

މޫސުމީ ލަފާގައި އިތުރަށް ބުނެފައިވަނީ މެދުރާއްޖެތެރެއާއި އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން، އަދި ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށެވެ.

މީގެ އިތުރުން، މެޓް އިން ވަނީ ކަނޑުތައް އާދައިގެ ވަރަށް މަޑުވާނެ ކަމަށާއި ރާޅުގެ އުސްމިނުގައި 2-4 ފޫޓް ހުންނާނެ ކަމަށް ވެސް ލަފާކޮށްފައެވެ.

މި މޫސުމީ ހާލަތާ ގުޅިގެން، މެޓް އިން ވަނީ ރައްޔިތުންނަށް ސަމާލުވުމަށް އިލްތިމާސްކޮށްފައެވެ. ޚާއްޞަކޮށް ކަނޑުދަތުރުފަތުރު ކުރާ ފަރާތްތަކަށް ވަނީ އިތުރަށް ސަމާލުވުމަށް އިރުޝާދު ދީފައެވެ.