ޞިއްޙަތަށް ފައިދާހުރި މޭވާއާއި ތަރުކާރީ ކެއުމުގެ މުހިންމުކަން އާންމުންނަށް އެނގޭއިރު، އެތަކެތި ކެއުމުގެ ކުރިން ރަނގަޅަށް ދޮވުމަކީވެސް އެހާމެ މުހިންމު ކަމެއްކަމަށް ޞިއްޙީ މާހިރުން ވިދާޅުވެއްޖެއެވެ. ދުނިޔޭގެ ޞިއްޙަތު ޖަމްޢިއްޔާގެ ތަފާސްހިސާބުތަކުން ދައްކާގޮތުގައި، ކާއެއްޗެހިން ޖެހޭ ބަލިތަކުގެ 46 އިންސައްތަ އަންނަނީ އާ ތާޒާ މޭވާއާއި ރަތުކާރީންނެވެ. މޭވާއާއި ތަރުކާރީގައި ބެކްޓީރިއާ، ފަންގަސް، ވައިރަސް އަދި ޕެސްޓިސައިޑް ފަދަ ނުރައްކާތެރި ތަކެތި ހުރެދާނެކަމަށް މާހިރުން ވިދާޅުވެއެވެ.
މޭވާއާއި ތަރުކާރީ ދޮވުމަށް އެންމެ އެކަށީގެންވަނީ ފިނި ފެނުގައި ދޮވެ، އަތުން ރަނގަޅަށް އުނގުޅުންކަމަށް ޞިއްޙީ މާހިރުން ލަފާދެއްވައެވެ. ނަމަވެސް ސައިބޯނި އަދި ބްލީޗް ފަދަ ކެމިކަލް ބޭނުން ނުކުރުމަށް އަންގަވައެވެ. ވިނެގަރ ނުވަތަ ބޭކިންގ ސޯޑާ ބޭނުންކުރެވިދާނެ ނަމަވެސް، ގިނައިރު އެތަކެތީގައި ބެހެއްޓުމަކީ އެދެވިގެންވާ ކަމެއް ނޫންކަމަށް އިރުޝާދު ދެއްވައެވެ.
މޭވާއާއި ތަރުކާރީގެ އެކި ބާވަތްތަކަށް އެކަށީގެންވާ ގޮތަށް ދޮވުމަށް ޞިއްޙީ މާހިރުން އިރުޝާދު ދެއްވައެވެ. މިގޮތުން، ހަރު ތޮށިގަނޑު ހުންނަ މޭވާ ފިނި ފެނުގައި އެއް މިނެޓު ވަންދެން ބެހެއްޓުމަށާއި، ފަތްގޮތަށް ހުންނަ ލެޓިއުސްއާއި ކެބެޖްފަދަ ތަރުކާރީ ވަކިވަކިން ރަނގަޅަށް ދޮވުމަށް ލަފާދެއްވައެވެ. އަދި ބެރީސް ފަދަ ތަކެތި ބޭނުންކުރުމުގެ ކުރިން އެކަނި ދޮވުމަށް އަންގައެވެ. ދޮވުމަށްފަހު، ފެން ރަނގަޅަށް ހިއްކާލުމަށާއި ފިނިކޮށް ރައްކާކުރުމަށް މާހިރުން އަންގަވައެވެ. މިފަދައިން ޢަމަލުކުރުމުން ބަލިޖެހުމުގެ ފުރުޞަތު މަދުވެ، މޭވާއާއި ތަރުކާރީ ރައްކާތެރިކަމާއެކު ބޭނުންކުރެވޭނެ ކަމަށް ފާހަގަކުރައްވައެވެ.
މޭވާއާއި ތަރުކާރީ ދޮވުމަކީ ބަލިޖެހުމުގެ ފުރުސަތު ވަރަށް ބޮޑަށް ކުޑަކޮށް، އެތަކެތި ރައްކާތެރިކަމާއެކު ބޭނުންކުރެވޭނެ ކަމެކެވެ. ދޮވުމުން ހުރިހާ ބެކްޓީރިއާއާއި ވައިރަސްތަކާއި ޕެސްޓިސައިޑްގެ އަސަރު ނައްތާނުލެވުނު ކަމުގައިވިޔަސް، ކާބޯތަކެތިން ޖެހޭ ބަލިތަކަށް މަގުފަހިކުރުވާ ގިނަ ތަޣައްޔަރުކުރުވާ ތަކެތި ނައްތާލެވެއެވެ. އާންމުކޮށް މޭވާއާއި ތަރުކާރީ ދޮވުމަކީ ގޮހޮރުގެ މައްސަލަތަކާއި އިންފެކްޝަންތަކާއި ދިގު މުއްދަތުގެ ސިއްޙީ މައްސަލަތަކަށް މަގުފަހިކުރުވާ ނުރައްކާތެރި މައިކްރޯބްތަކާއި ކެމިކަލްތައް ހަށިގަނޑަށް ވަނުން ހުއްޓުވުމަށް އެހީތެރިވެދޭ ކަމެކެވެ. ރަނގަޅަށް ދޮވުމާއި ރައްކާތެރިކަމާއެކު ރައްކާކުރުމުގެ އާދަތައް އެކުގައި ގެންގުޅުމުން، މޭވާއާއި ތަރުކާރީ ތާޒާކަމާއި ދުޅަހެޔޮކަމާއެކު ބޭނުންކުރެވޭނެކަން ޔަގީންކުރެވެއެވެ.
