ސަރުކާރު ހިއްސާވާ ކުންފުނިތަކުގެ ހިންގުން އިތުރަށް ހަރުދަނާކުރުމުގެ މަޤްޞަދުގައި، މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އާއި އެގްރޯ ނެޝަނަލް ކޯޕަރޭޝަން (އެގްރޯނެޓް) އުވާލުމަށް ނިންމާފައިވެއެވެ. މި ނިންމުމާ ގުޅިގެން، އެމްއައިޓީޑީސީގެ މަސްއޫލިއްޔަތުތައް މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) ގެ ދަށަށް ބަދަލުކުރެވޭނެއެވެ. އަދި އެގްރޯނެޓްގެ މަސްއޫލިއްޔަތުތައް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑާ ހަވާލުކުރެވޭނެއެވެ.
ފާހަގަކޮށްލެވޭ ގޮތުގައި، އެގްރޯނެޓަށް ދައުލަތުން 33 މިލިއަން ރުފިޔާ ދޫކުރައްވާފައިވާއިރު، އެމްއައިޓީޑީސީއަށް 8.1 މިލިއަން ރުފިޔާ ދޫކުރައްވާފައިވެއެވެ. މި ދެ ކުންފުނި އުފެއްދެވުމުގެ މައިގަނޑު މަޤްޞަދަކީ ޤައުމުގެ އިޤްތިޞާދީ ދާއިރާ ތަރައްޤީކޮށް ކުރިއެރުވުމެވެ. މި ބަދަލުތައް ގެނައުމުގެ މައިގަނޑު މަޤްޞަދަކީ ސަރުކާރު ހިއްސާވާ ކުންފުނިތަކުގެ ހިންގުން އިތުރަށް ހަރުދަނާކޮށް، އެ ކުންފުނިތަކުގެ މަސައްކަތްތައް އެއް ފުރާޅެއްގެ ދަށުން ހަރުދަނާކަމާއެކު ކުރިއަށް ގެންދިއުމެވެ.
