ދުނިޔޭގެ އެކި ކަންކޮޅުތަކުގައި ގިނަ ބަޔަކު ކެތްމަދުވެފައި އިންތިޒާރު ކުރަމުން އަންނަ ވީޑިއޯ ގޭމް، "ގްރޭންޑް ތެފްޓް އޮޓޯ 6" (ޖީޓީއޭ 6) ރަސްމީކޮށް ނެރުމުގެ ކުރިން ކުރިއާލައި ވިއްކި ޕްރީ-އޯޑަރުތަކުން އެއް ބިލިއަން އެމެރިކާ ޑޮލަރުގެ އާމްދަނީއެއް ހޯދައިފިއެވެ.
އެނަލިޓިކްސް ފާމެއް ކަމަށްވާ ސެންސާ ޓަވަރގެ އަންދާޒާތަކުން ދައްކާ ގޮތުގައި، މި ގޭމް ރަސްމީކޮށް ނެރުމުގެ ކުރިން މިހާތަނަށް ވަނީ 10.3 މިލިއަނަށް ވުރެ ގިނަ ޑިޖިޓަލް ކޮޕީ ވިކިފައެވެ. ނަމަވެސް، މި އަދަދުތަކަކީ އެ ކުންފުނީގެ އަންދާޒާތަކެއް ކަމަށާއި، މިކަން ގޭމް އުފައްދާ ރޮކްސްޓާ ގޭމްސް ނުވަތަ އެ ކުންފުނީގެ މައި ކުންފުނި ޓޭކް-ޓޫ އިންޓަރއެކްޓިވް އިން އަދި ރަސްމީކޮށް ކަށަވަރުކޮށްދީފައެއް ނުވެއެވެ.
ޕްލޭސްޓޭޝަން 5 (ޕީއެސް 5) އަދި އެކްސްބޮކްސް ސީރީޒް އެކްސް/އެސް އަށް މި ގޭމް ރަސްމީކޮށް ނެރުމަށް ހަމަޖެހިފައިވަނީ 19 ނޮވެމްބަރު 2026 ގައެވެ. މިއީ ތާރީހުގައި ދެވަނައަށް އެންމެ ގިނައިން ވިކިފައިވާ ގޭމް ކަމަށްވާ ޖީޓީއޭ 5 ނެރުނުތާ 13 އަހަރަށް ވުރެ ގިނަ ދުވަސް ފަހުން ނެރޭ އެ ސީރީޒްގެ އައު ގޭމެވެ. ޖީޓީއޭ 5 ގެ ގާތްގަނޑަކަށް 230 މިލިއަން ކޮޕީ މިހާތަނަށް ވަނީ ވިކިފައެވެ.
Advertisement
ރިޕޯޓްތައް ބުނާ ގޮތުގައި ޖީޓީއޭ 6 ގެ ޕްރީ-އޯޑަރުގެ ބޮޑު ބައެއް ހިއްސާކުރަނީ ޕީއެސް 5 އެވެ. އެގޮތުން ޕްރީ-އޯޑަރުގެ ގާތްގަނޑަކަށް 75 އިންސައްތަ (751 މިލިއަން ޑޮލަރު) ޕީއެސް 5 ކޮންސޯލްތަކުން ހިއްސާކުރާއިރު، ބާކީ 25 އިންސައްތަ (250 މިލިއަން ޑޮލަރު) ހިއްސާކުރަނީ އެކްސްބޮކްސް ސީރީޒް އެކްސް/އެސް އެވެ. މީގެއިތުރުން، ގޭމް ގަތް މީހުންގެ 89 އިންސައްތަ މީހުން ގަނެފައިވަނީ އަގުބޮޑު، 100 ޑޮލަރުގެ "އަލްޓިމޭޓް އެޑިޝަން" އެވެ. އަދި 80 ޑޮލަރުގެ "ސްޓޭންޑަޑް އެޑިޝަން" ގަނެފައިވަނީ 11 އިންސައްތަ މީހުންނެވެ.
މި ގޭމް ޕްރީ-އޯޑަރު ކުރި ފަރާތްތަކަށް، ގޭމް ނުކުންނަ ދުވަހުގެ ކުރިން ޑައުންލޯޑް ކޮށްލުމުގެ ފުރުސަތު (ޕްރީ-ޑައުންލޯޑް) މިހާރު ވަނީ ހުޅުވާލާފައެވެ. މި ގޭމް އެޅުމަށްޓަކައި ކޮންސޯލްތަކުން 212 ޖީބީގެ ސްޓޯރޭޖް ޖާގަ ބޭނުންވާނެ ކަމަށް ރޮކްސްޓާ އިން މައުލޫމާތު ދެއެވެ.
އެމެރިކާގެ ފްލޮރިޑާ އަސްލަކަށް ބަލައިގެން އުފައްދާފައިވާ "ލިއޮނިޑާ" ކިޔާ ހިޔާލީ ސްޓޭޓެއްގައި ހިނގާ މި ގޭމުގެ ވާހަކަ ބިނާވެފައިވަނީ ލޫސިއާ އަދި ޖޭސަން ކިޔާ ކުށްކުރާ ދެ ލޯބިވެރިންގެ މައްޗަށެވެ. މުޅި މި ގޭމް އުފެއްދުމަށް ގާތްގަނޑަކަށް 1 ބިލިއަނާއި 1.5 ބިލިއަން ޑޮލަރާ ދެމެދުގެ ބަޖެޓެއް ހޭދަވި ކަމަށް ބެލެވެއެވެ. މުޅި ޖީޓީއޭ ފްރެންޗައިޒްގެ 470 މިލިއަނަށް ވުރެ ގިނަ ޔުނިޓް މިހާތަނަށް ވަނީ ދުނިޔޭގެ ބާޒާރުގައި ވިކިފައެވެ.
