ސައޫދީ އަރަބިއްޔާގެ ވައިގެ ބަނދަރުތަކަށް އަމާޒުކޮށް ޔަމަނުގެ ހޫޘީ ހަނގުރާމަވެރިން ދެމުންގެންދާ ފިނޑި ޓެރަރިސްޓް ހަމަލާތައް މުސްލިމް ވޯލްޑް ލީގް (އެމްޑަބްލިއުއެލް) އިން ހަރުކަށި އިބާރާތުން ކުށްވެރިކޮށްފިއެވެ.
މުސްލިމް ވޯލްޑް ލީގުން ނެރުނު ބަޔާނެއްގައި ބުނެފައިވަނީ، އާންމު ރައްޔިތުންނާއި މަދަނީ ވަސީލަތްތަކަށް، ހާއްސަކޮށް ބައިނަލްއަގުވާމީ ވައިގެ ދަތުރުފަތުރުގެ ހިދުމަތް ދޭ އެއާޕޯޓުތަކަށް އަމާޒުކޮށް ހޫޘީން ދޭ މިފަދަ ހަމަލާތަކަކީ ބައިނަލްއަގުވާމީ ގާނޫނުތަކާއި އިންސާނީ ހައްގުތަކާ ކަނޑައެޅިގެން ހިލާފު، އަދި އިސްލާމީ ރިވެތި އުސޫލުތަކާ ވެސް ބީރައްޓެހި ޖަރީމާތަކެއް ކަމަށެވެ. އަދި މިއީ ސަރަހައްދުގެ ސަލާމަތާއި ރައްކާތެރިކަން ނަގާލުމަށް ހިންގާ ނުރައްކާތެރި އަމަލުތަކެއްގެ ގޮތުގައި އެ ޖަމާއަތުން ވަނީ ސިފަކޮށްފައެވެ.
އެ ޖަމާއަތުގެ ސެކްރެޓަރީ ޖެނެރަލް ވިދާޅުވީ، ސައޫދީ އަރަބިއްޔާގެ ސިޔާދަތާއި، އެ ގައުމުގެ ރައްޔިތުންނާއި އެ ގައުމުގައި ދިރިއުޅޭ އެންމެހައި ފަރާތްތަކުގެ ރައްކާތެރިކަން ދެމެހެއްޓުމަށްޓަކައި އަޅަންޖެހޭ ކޮންމެ ފިޔަވަޅަކަށް އިސްލާމީ އުންމަތުގެ ފުރިހަމަ ތާއީދު އޮންނާނެ ކަމަށެވެ. މީގެ އިތުރުން، މިފަދަ ޓެރަރިސްޓް ހަމަލާތައް ހުއްޓުވުމަށް ބައިނަލްއަގުވާމީ މުޖުތަމައުން ހަރުދަނާ ފިޔަވަޅުތަކެއް އަޅަންޖެހޭ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
Advertisement
ޔަމަނުގެ ހަނގުރާމައިގެ ތެރެއިން ހޫޘީން ދަނީ ޑްރޯން އަދި މިސައިލް ބޭނުންކޮށްގެން ސައޫދީގެ އެކި ސަރަހައްދުތަކަށް، ހާއްސަކޮށް ދެކުނުގެ ވައިގެ ބަނދަރުތަކަށް އިރުއިރުކޮޅާ ހަމަލާތައް ފޮނުވަމުންނެވެ. ނަމަވެސް، ސައޫދީގެ ދިފާއީ ބާރުތަކުން ގިނަ ހަމަލާތައް ވައިގެ ތެރޭގައި ނައްތާލައި، އާންމުންނަށް ލިބިދާނެ ބޮޑެތި ގެއްލުންތަކުން ރައްކާތެރިކަން ހޯދަމުންދެއެވެ.
މުސްލިމް ވޯލްޑް ލީގުން ވަނީ ސައޫދީ އަރަބިއްޔާއާއެކު ސާބިތުކަމާއެކު ތިބިކަން ހާމަކޮށް، އެ ގައުމުގެ އަމާންކަމާއި ހަމަޖެހުމަށް އެދި ދުއާކޮށްފައެވެ.
