ދިވެހި ބޮޑީ ބިލްޑާރް އަދި މިސްޓާރ މޯލްޑިވްސް މުހައްމަދު ޔާމީން (ޔާންބެ)ގެ ދެ ކިޑްނީ ފެއިލްވެ އޭނާ ދަނީ ފަރުވާ ހޯދަމުންނެވެ.
ޔާންބެގެ ދެ ކިޑްނީ ފެއިލްވެފައި ވާކަން އެނގިފައިވަނީ ބަލީގެ އަލާމާތްތަށް ފެންނަން ފެށުމުން، އޮގަސްޓު މަހުގެ ކުރީކޮޅު ހެދި ލޭގެ ޓެސްޓުގެ ނަތީޖާއިންނެވެ. ދެ ކިޑްނީ ފެއިލްވެފައި ވާކަން ދެނެގަނެވުނުއިރު ބަލި ހުރީ ފަސް ވަނަ ސްޓޭޖް ނުވަތަ އެންމެ ފަހު ސްޓޭޖުގައި ކަމުން ޑޮކްޓަރުން އިރުޝާދު ދީފައިވަނީ ލަސްނުކޮށް ކިޑްނީ ޓްރާންސްޕްލާންޓު ހަދަން ކަމަށް ޔާންބެ ބުނެފައިވެއެވެ.
ކިޑްނީ ޓްރާންސްޕްލާންޓް ހެދުމަށް ސެޕްޓެންބަރ މަހުގެ ނުވަވަނަ ދުުވަހު އިންޑިއާއަށް ދިއުމަށް ޔާންބެ އަންނަނީ ތައްޔާރު ވަމުންނެވެ.
Advertisement
ކިޑްނީ ޓްރާންސްޕްލާންޓު އޮޕަރޭޝަންއަކީ ހަރަދު ބޮޑު ކަމަކަށް ވުމާއެކު، ޔާންބެ ވަނީ އޮޕަރޭޝަން ކުރުމަށް ބޭނުންވާ ފައިސާ ހޯދުމަށް އާންމުންގެ އެހީތެރިކަމަށް އެދިފައެވެ. ޔާންބެގެ އުފަން ރަށް ށ. ފުނަދޫ ރައްޔިތުންތަކެއް އިސް ނަގައިގެން މި އޮޕަރޭޝަންއަށް އެހީ ވުމަށް ފަންޑް ރެއިޒިން އިވެންޓެއް ވަނީ ފަށާފައެވެ.
ޔާންބެއަށް އެހީވުމަށް؛
- 7770000138064 ރުފިޔާ އެކައުންޓް
- 7730000569416 ޑޮލަރު އެކައުންޓް
ޔާންބެވަނީ މިސްޓަރ މޯލްޑިވްސްގެ ލަގަބު ހަތަރު ފަހަރު ހޯދާ، މިދިޔަ ތިން އަހަރުވެސް މި މަގާމް ހާސިލްކޮށްފައެވެ. އަދި ޔާންބެއަކީ މި މަގާމް އެންމެ ގިނަ ފަހަރު ހާސިލް ކޮށްފައިވާ ފަރާތެވެ. މީގެ އިތުރުން ދެކުނު އޭޝިޔާ ބޮޑީބިލްޑިން މުބާރާތުގެ އިތުރުން އޭޝިއަން ޗެމްޕިއަން ޝިޕްގައި ޔާންބެ ވަނީ ރަން މެޑަލް ހޯދާފައިވެއެވެ.
