ކ. ހުވަފެންފުށި ދެކުނުގެ ހިއްކި ސަރަޙައްދުން މީހަކު ގެއްލިގެން ފުލުހުން ހޯދަމުންދާ ކަމަށް ދިވެހި ފުލުހުންގެ ޚިދުމަތުން މަޢުލޫމާތު ދީފިއެވެ.
ގެއްލިގެން ހޯދަމުންދާ ފަރާތަކީ މ. އަސަރީހަނދާންގެ ތަސްލީމް މުޙައްމަދު (43 އަހަރު) ކަމަށް ފުލުހުން ބުނެއެވެ. އޭނާ އެންމެފަހުން ފެނިފައިވަނީ އިއްޔެ ހެނދުނު 10 އާއި 11 އާ ދެމެދުގެ ވަގުތެއްގައި ކަމަށް ވެއެވެ.
ފުލުހުން މިހާރު ދަނީ ތަސްލީމް ހޯދުމުގެ މަސައްކަތް ކުރަމުންނެވެ. އަދި އޭނާއާ ބެހޭ އެއްވެސް މަޢުލޫމާތެއް ލިބޭނަމަ ފުލުހުންނަށް އެންގުމަށް އާންމުންނަށް އިލްތިމާސްކޮށްފައިވެއެވެ.
Advertisement
މީގެއިތުރުން، ބުރާސްފަތި އަދި ހުކުރު ދުވަހު އެ ސަރަޙައްދަށް ދަތުރުކުރި ފަރާތްތަކުން ހިންމަފުށި ޕޮލިސް ސްޓޭޝަނަށް (9794639) ގުޅައި މަޢުލޫމާތު ދިނުމަށްވެސް ފުލުހުން އެދިފައިވެއެވެ.
ތަސްލީމް ގެއްލިގެން ހޯދަމުންދާތާ މިހާރު ވަނީ ދެ ދުވަސް ވެފައެވެ. ފުލުހުންގެ ފަރާތުން މި މައްސަލައާ ގުޅޭ އިތުރު މަޢުލޫމާތު ހާމަކުރާނެ ކަމަށް ބެލެވެއެވެ.
