ވެލާނާ އިންޓަރނޭޝަނަލް އެއަރޕޯޓް (ވީއައިއޭ) މެދުވެރިކޮށް، ގަވާއިދާ ހިލާފަށް ރާއްޖެއިން ބޭރަށް ގާތްގަނޑަކަށް 3.86 މިލިއަން ދިވެހި ރުފިޔާއަށްވާ ބޭރު ފައިސާ ގެންދަން އުޅުނު ހަ ބިދޭސީއަކު މި މަހުގެ 18ވަނަ ދުވަހު އަތުލައިގަނެފިއެވެ.

ގަވާއިދާ ހިލާފަށް ފައިސާ މާރުކުރުމުގެ މުއާމަލާތްތައް ހިންގާ ފަރާތްތަކާ ދެކޮޅަށް ފުލުހުންގެ ހާއްސަ ޓާސްކް ފޯހަކުން ކުރިއަށްގެންދިޔަ އޮޕަރޭޝަނެއްގައި މި ފައިސާތައް ހޯދާފައި ވަނީ ސީރިއަލް ޕެކެޓުތަކެއްގެ ތެރޭގައި ފޮރުވައިގެން ރާއްޖެއިން ބޭރުކުރަން މަސައްކަތްކުރަނިކޮށެވެ. އަތުލައިގަނެވުނު ފައިސާގެ ތެރޭގައި ދުނިޔޭގެ 18 ގައުމެއްގެ ފައިސާ ހިމެނޭއިރު، އޭގެ ތެރޭގައި 174,161 އެމެރިކާ ޑޮލަރާއި، 56,760 ޔޫރޯގެ އިތުރުން 1,815 އިނގިރޭސި ޕައުންޑް ހިމެނެއެވެ.

މި މައްސަލައިގައި ކަޅު ފައިސާ ދޮވުމުގެ (މަނީ ލޯންޑަރިން) ތުހުމަތުގައި ފުލުހުންގެ ބެލުމުގެ ދަށަށް ގެންގޮސްފައި ވަނީ ބަންގްލަދޭޝްއަށް ނިސްބަތްވާ ހަ ފިރިހެނުންނެވެ. އެއީ މުހައްމަދު މައިނުއްދީން ސަލާހު (35އ)، ރަޖިބް (31އ)، މުހައްމަދު އަބްދުﷲ (38އ)، އަޖްގަރު މިރިދާ (37އ)، އެމްޑީ މޮހިއްދީން ޗޯދުރީ (28އ) އަދި އެމްޑީ ޝާހިން މިއާ (46އ) އެވެ. މީގެ ތެރެއިން މައިނުއްދީން، މޮހިއްދީން އަދި މުހައްމަދު އަބްދުﷲ ކޯޓުގައި ބުނެފައި ވަނީ އެއަރޕޯޓަށް ދިޔައީ ބަޔަކު ފުރުވުމަށާއި މީހަކާ ހަވާލުވުމަށް ކަމަށެވެ. އަދި ރަޖިބް އާއި ޝަހީން މިއާ ބުނީ ފައިސާ ފެނުނު ލަގެޖާއި ޕާރުސަލްތަކަކީ އަޖްގަރު މިރިދާއާ ހަވާލުކުރަން ގެންދިޔަ، އެތެރޭގައި ހުރި އެއްޗެއް ނޭނގޭ ތަކެތި ކަމަށެވެ. އަޖްގަރު ބުނެފައި ވަނީ އެއީ ފުރަން ގޮސް ހުއްޓައި ނުދަންނަ މީހަކު އެހީތެރިކަމަށް އެދުމުން ހަވާލުވި ލަގެޖެއް ކަމަށެވެ.

މި އެންމެން ވެސް ފެނުނު ފައިސާއާ އެއްވެސް ގުޅުމެއް ނެތް ކަމަށް ބުނެ ކޯޓުގައި ދައުވާއަށް އިންކާރުކުރި ނަމަވެސް، ފުލުހުން ހުށަހެޅި އިންޓެލިޖެންސް ރިޕޯޓާއި ހާދިސާ ހިނގި ގޮތުގެ ރިޕޯޓަށް ރިއާޔަތްކޮށް ކްރިމިނަލް ކޯޓުން ވަނީ އެ މީހުންގެ ބަންދަށް 10 ދުވަހުގެ މުއްދަތެއް ދީފައެވެ.

ރާއްޖޭގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ހުއްދަނެތި ގަވާއިދާ ޚިލާފަށް ބޭރު ފައިސާގެ ވިޔަފާރިކުރާ ފަރާތްތައް ހޯދުމަށް ފުލުހުން ވަނީ އާންމުންގެ އެހީތެރިކަމަށް އެދިފައެވެ. އެގޮތުން، މިފަދަ ކަންކަމުގެ މައުލޫމާތު 9388733އަށް ވައިބަރ، ވަޓްސްއެޕް ނުވަތަ ޓެލެގްރާމް މެދުވެރިކޮށް ހިއްސާކުރުމަށް ފުލުހުން އިލްތިމާސްކުރެއެވެ. މައުލޫމާތުދޭ ފަރާތްތަކުގެ ވަނަވަރު ސިއްރުކޮށްދޭނެ ކަމަށާއި، އެފަދަ ފަރާތްތަކުން ތަހުގީގުގެ އެއްވެސް މަރުހަލާއެއްގައި ބައިވެރިވާން ނުޖެހޭނެ ކަމުގެ ޔަގީންކަން ވެސް ފުލުހުން ވަނީ ދީފައެވެ.