ދަރުމަވަންތަ ހޮސްޕިޓަލުގެ އިމާރާތުގެ ދެ ފަންގިފިލާއެއްގައި ތިބި ރާއްޖޭގެ ގައުމީ ޔުނިވާސިޓީ (އެމްއެންޔޫ) އިން މެޑިސިން ނުވަތަ ޑޮކްޓަރީކަން ކިޔަވަމުންދާ ދަރިވަރުންނަށް މިހާރަށްވުރެ ފުރިހަމައަށް ފެސިލިޓީތައް ގާއިމުކޮށްދެއްވާނެ ކަމަށް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ވިދާޅުވެފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެެެވެ.
ހީނާ މިފަދައިން ވިދާޅުވެފައިވަނީ ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި އެކަމާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
Advertisement
އެގޮތުން ހީނާ ވިދާޅުވީ، ދަރިވަރުންގެ ތައުލީމީ ހައްގުތައް ރައްކާތެރިކުރުމަކީ ރައީސް ވަރަށް ބޮޑު އިސްކަމެއް ދެއްވާ ކަމެއް ކަމަށާއި މިހާރަށްވުރެ ފުރިހަމައަށް ދަރިވަރުންނަށް ފެސިލިޓީތައް ގާއިމު ކޮށްދެއްވާނެ ކަމަށް ރައީސް ވިދާޅުވެފައިވާ ކަމަށެވެ. އެކަމުގެ ޔަގީންކަން ރައީސް ދެއްވާފައިވާއިރު، މީގެ ކުރީ ސަރުކާރުތަކަށްވުރެ ބޮޑަށް ދަރިވަރުންގެ ތައުލީމަށް މިސަރުކާރުން އިސްކަމެއް ދެއްވާނެ ކަމަށް ހީނާ ވިދާޅުވިއެވެ.
ދަރުމަވަންތަ ހޮސްޕިޓަލުގައި ތިބި ދަރިވަރުން އެތަނުން ނެރެން އެންގި މައްސަލައާއި ގުޅިގެން ސްޓޫޑެންޓުންގެ ޔޫނިއަން، އައިޖީއެމްއެޗްގެ އިސްބޭފުޅުންގެ އިތުރުން ރައީސް އޮފީހުގެ ޕޮލިސީ ލެވެލްގެ ބޭފުޅުން މަޝްވަރާ ކުރެއްވި ކަމަށް ހީނާ ވިދާޅުވިއެވެ.
"އެއްގޮތަކަށް ވެސް މިއުޅެނީ މެޑިކަލް ސްޓޫޑެންޓުން އައިޖޭއެމްއެޗުން ނެރޭކަށެއް ނޫން. ކުއްލިއަކަށް މިކަން ކުރާކަށެއް ނޫން މިއުޅެނީ. ތިބޭފުޅުންނަށް އެނގޭނެ، އަޅުގަނޑުމެން މި ކުރަނީ އެކުއެކީގައި ކުރަން ޖެހޭ ކަންކަން. ވަރަށް ގިނަކަންކަން ވަނީ ބޮއްސުންލާފަ. ވަރަށް ގިނަ ކަންކަން އަޅުގަނޑުމެން ރަނގަޅު ކުރަން ޖެހޭ. ބައިވަރު ކަންކަން އެބަ ހުރި އެޓެންޑްވާން. ވަރަށް އަވަހަށް، ވަގުތެއް ނެތް. ވަރަށް އަވަހަށް ނިންމަން ޖެހޭ ކަންކަން އެބަހުރި" ހީނާ ވިދާޅުވިއެވެ.
ހީނާ ވިދާޅުވި ގޮތުގައި މި މައްސަލަ ނުކުންނަ ހިސާބަކީ އައިޖީއެމްއެޗްގެ އެނދުގެ ދަތިކަން ހުރުމުން، އެނދުތައް އިތުރު ކުރަން ޖެހުމެވެ. އަދި އެތަނުގައި އިތުރު އޮޕަރޭޝަން ތިއޭޓަރުތަކާއި އެހެނިހެން ފެސިލިޓީތައް ގާއިމު ކުރަން ޖެހޭ ހިސާބު ކަމަށް ހީނާ ފާހަގަ ކުރެއްވިއެވެ.
"މިއީ ވަރަށް މުހިންމު ދާއިރާއެއް. ކޮންމެ ދުވަހަކު އައިޖީއެމްއެޗްގައި ކިހާ ބޮޑު ކިއުއެއް އޮވޭތޯ. އެމަޖެންސީ ބައިގައި އެނދު ނެތިގެން އެޑްމިޓް ކުރަން ޖެހޭ އެތައް ބަލި މީޙުން އެތަނުގައި ތެރޭގައި އެބަ ތިބޭ. މިކަން ކަމަކީ ވެސް ސީރިއަސް ކަމެއް ހައްލު ކުރަން ޖެހޭ." ހީނާ ވިދާޅުވިއެވެ.
އެހެން ކަމުން އައިޖީއެމްއެޗްއާއި ދަރުމަވަންތަ ހޮސްޕިޓަލަށް ގެންނަން ޖެހޭ ބަދަލުތައް ގެނައުމީ ވެސް މިސަރުކާރުން އިސްކަމެއް ދޭ ކަމެއް ކަމަށާއި ހަމަ އެއާއެކު ދަރިވަރުންގެ ތައުލީމަށް ކުރަން ޖެހޭ ކަންކަމަކީ ވެސް ހާއްސަ އަހައްމިއްޔަތު ކަމެއް ދޭ ކަމެއް ކަމަށް ހީނާ ވިދާޅުވިއެވެ.
ހީނާ ވިދާޅުވި ގޮތުގައި މިހާރު ކުރެވުނު މަޝްވަރާގެ ތެރެއިން މިހާރު އެއްބަސްވެފައި އޮތީ ގެންނަން ޖެހޭ ބަދަލުތައް ވެސް ގެނެވޭ ގޮތަށް އަދި ދަރިވަރުންނަށް އެކަމުގެ އުނދަގޫ ތަހައްމަލު ކުރަން ނުޖެހޭނެ ގޮތަކަށް ކުރިއަށް ދިއުމެވެ.
"ކުރިއަށް އޮތް ތަނުގައި އެ މަޝްވަރާގެ ތެރެއިން މެޑިކަލް ސްޓޫޑެންޓުންނަށް ލުއި ފަސޭހަ ގޮތެއްގައި އެކުދިން ކިޔެވުމުގެ ކަންކަން ކުރިއަށް ގެންދެވޭނެ ގޮތަކަށް އެބައި ހަމަޖެހިގެންދާނެ" ހީނާ ވިދާޅުވިއެވެ.
