އޯލެވެލް އަދި އޭލެވެލްގެ ސައްހަ ނޫން ސަނަދުތަކެއް ދައުރުވަމުންދާކަން ފާހަގަކުރެވިފައިވާ ކަމަށް މޯލްޑިވްސް ކޮލިފިކޭޝަން އޮތޯރިޓީ ބުނެފިއެވެ.
މި ކަންބޮޑުވުން ފާޅުކުރަމުން އެމްކިއުއޭ އިން ނެރުނު ނޫސް ބަޔާނުގައި ބުނެފައިވަނީ ދަރިވަރުންނަށް އެންރޯލްމެންޓް ނުވަތަ ޕްލޭސްމެންޓް ދިނުމުގެ ކުރިން، ހުށަހަޅާ ސަނަދުތަކުގެ ސައްހަކަން ކަށަވަރުކުރުމަށް މަތީ ތައުލީމްދޭ މަރުކަޒުތަކުން ސަމާލުކަން ދިނުމަށެވެ. މިކަމަކީ ތައުލީމީ ދާއިރާގެ އިތުބާރު ހިފެހެއްޓުމަށް އަދި ދަރިވަރުންގެ މުސްތަޤުބަލަށް މުހިންމު ކަމެއް ކަމަށް އެމްކިއުއޭ އިން ފާހަގަކޮށްފައިވެއެވެ.
މި މައްސަލައާ ގުޅިގެން އެމްކިއުއޭ އިން ވަނީ ސަނަދުތަކުގެ ސައްހަކަން ޔަގީންކުރުމަށް އިތުރު ފިޔަވަޅުތަކެއް އަޅާނެ ކަމަށް ބުނެފައެވެ. އަދި މިފަދަ ސައްހަ ނޫން ސަނަދުތައް ބޭނުންކުރާ ފަރާތްތަކާމެދު ޤާނޫނީ ފިޔަވަޅު އެޅޭނެ ކަމަށްވެސް އިންޒާރުދީފައިވެއެވެ.
Advertisement
އެމްކިއުއޭ އިން މި މައްސަލަ ބަލަމުންދާއިރު، ދަރިވަރުންނާއި ބެލެނިވެރިންނަށް ވަނީ ސަނަދުތަކުގެ ސައްހަކަން ކަށަވަރުކުރުމަށް އިލްތިމާސްކޮށްފައެވެ. އަދި ޝައްކު އުފެދޭ ސަނަދުތަކާ ގުޅޭގޮތުން އެމްކިއުއޭ އަށް މައުލޫމާތު ދިނުމަށްވެސް އެދިފައިވެއެވެ.
