ރާއްޖޭގައި އުފަންވާ ކުދިންގެ ނިސްބަތް ރެކޯޑް މިންވަރަކަށް ވެއްޓިއްޖެ ކަމަށް ތަފާސްހިސާބުތަކުން ދައްކައިފިއެވެ.
1995 ވަނަ އަހަރު އަންހެނަކަށް ޖެހޭ އުފަންވާ ކުދިންގެ ނިސްބަތް 6.4 ގައި ހުރި ނަމަވެސް، 2022 ވަނަ އަހަރާ ހަމައަށް އައިއިރު މި އަދަދު ވަނީ 1.7 އަށް ދަށްވެފައެވެ. މިއީ އާބާދީއެއް އަމިއްލައަށް އިތުރުވުމަށް ބޭނުންވާ މިންގަނޑު ކަމަށްވާ "ރިޕްލޭސްމަންޓް ލެވެލް" (2.1) އަށްވުރެވެސް ބޮޑުތަނުން ދަށް އަދަދެކެވެ.
ވޭތުވެދިޔަ އަހަރުގެ ތަފާސްހިސާބުތަކަށް ބަލާއިރު ރާއްޖޭގައި މުޅިއެކު އުފަންވެފައި ވަނީ 5,625 ކުދިންނެވެ. މީގެ ތެރެއިން އެންމެ ބޮޑު އިންސައްތައެއް ހިއްސާކުރަނީ މާލޭގެ އާބާދީއެވެ. އެއީ މާލެއަށް އުފަންވި 3,927 ކުދިން (%69.8) އެވެ. ބާކީ 1,698 ކުދިން (%30.2) އަތޮޅުތެރެއަށް އުފަންވިއިރު، އެންމެ ގިނައިން އުފަންވެފައި ވަނީ ހދ. އަތޮޅަށެވެ. އެއީ 385 ކުދިންނެވެ. އެންމެ މަދުން ކުދިން އުފަންވީ ކ. އަތޮޅުގެ ރަށްތަކަށެވެ. އެ އަތޮޅުގެ ރަށްތަކަށް އުފަންވެފައިވަނީ އެންމެ ކުއްޖެކެވެ.
Advertisement
އުފަންވާ ނިސްބަތް މިފަދަ ބޮޑު މިންވަރަކަށް ދަށްވަމުންދާއިރު، ރާއްޖޭގައި ނިޔާވާ މީހުންގެ އަދަދު ހުރީ 1,399 ގައެވެ. މީގެ ތެރެއިން %61.3 އަކީ އުމުރުން 65 އަހަރުން މަތީގެ މީހުންނެވެ. މި ބަދަލުތަކަކީ ރާއްޖޭގެ އިޖުތިމާޢީ އަދި އިޤްތިޞާދީ އޮނިގަނޑަށް އަންނަމުންދާ ބޮޑު ބަދަލެއްގެ ނިޝާނެކެވެ. ސަބަބަކީ ކުރިއަށް އޮތް ތަނުގައި މަސައްކަތްތެރި އާބާދީ މަދުވެ، އުމުރުން ދުވަސްވީ މީހުން ބެލެހެއްޓުމުގެ ޒިންމާ ބޮޑުވެގެންދާނެތީއެވެ.
