ސްޓޭޓް ޓްރޭޑިން އޮގަނައިޒޭޝަން (އެސްޓީއޯ)ގެ ސަބްސިޑަރީ ކުންފުންޏެއްގެ ގޮތުގައި ފެނަކަ ކޯޕަރޭޝަން ލިމިޓެޑް ބަދަލު ކުރުމުން، ފައިދާވާނެ ކުންފުންޏަކަށް އެ ކުންފުނި ހަދާނެކަމަށް އެސްޓީއޯއިން ވައުދުވެއްޖެއެވެ.
ފެނަކަ ، އެސްޓީއޯގެ ސަބްސިޑަރީއަކަށް ވެގެންދާނީ މުވައްޒަފުންގެ އަދަދު ކަނޑައެޅުމުގެ އިހްތިޔާރާއެކު ކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެސްޓީއޯގެ މެނޭޖިންގ ޑައިރެކްޓަރ ޝިމާދު އިބްރާހީމް ވިދާޅުވީ، މިމަހުގެ 15 ވަނަ ދުވަހު ފެނަކަ ކޯޕަރޭޝަން ގަތުމަށް އެސްޓީއޯއަށް ޕްރޮޕޯޒަލް ހުށައަޅާފައި ވާކަމަށެވެ. އަދި ރާއްޖެއިން ބޭރުން އެންމެ ގިނައިން ތެޔޮ އެތެރެކުރާ ކުންފުންޏަކީ އެސްޓީއޯ ކަމަށް ވެފައި، ފެނަކަ އަށް ކަރަންޓު އުފެއްދުމަށް ބޭނުންވާ ޑީސަލް ފޯރުކޮށްދެނީ ވެސް އެކުންފުނިން ކަމަށް އޭނާ ވަނީ ފާހަގަ ކޮށްފައެވެ.
Advertisement
އެސްޓީއޯ އިން ބުދަ ދުވަހު ނެރުނު ބަޔާނެއްގައި ބުނެފައި ވަނީ ފެނަކައިގެ ދަރަނީގެ ބޮޑު ބައެއް ދައްކަން ޖެހެނީ އެސްޓީއޯ ގްރޫޕަށް ކަމަށެވެ. އަދި އެ ކުންފުނިން ވަނީ ރިކަވަރީ ޕްލޭން އެކުލަވާލާނެ ކަމުގެ ޔަގީންކަން ދީ، ގްރޫޕަށް ދައްކަން ޖެހޭ ފެނާކާގެ ދަރަނި ވެސް އަނބުރާ ލިބޭނެ ކަމުގެ ޔަގީންކަން ދީފައެވެ.
އެސްޓީއޯގެ އިތުރުން އެހެން ފަރާތްތަކަށް ދައްކަން ޖެހޭ ފައިސާއާ އެކު ފެނަކައިގެ ދަރަނި 4.1 ބިލިއަން ރުފިޔާއަށް އަރަ އެވެ.
އެސްޓީއޯގެ ބޯޑުން އިތުރަށް އަންގާފައި ވަނީ ފެނަކައިގެ އޮޕަރޭޝަންތައް އިތުރަށް ފުރިހަމަ ކުރުމަށް ފިނޭންސް މިނިސްޓްރީގެ އެއްބާރުލުމާއެކު ކުރިއަށް ގެންދާނެކަމަށެވެ.
އެސްޓީއޯ އިން ބުނި ގޮތުގައި ފެނަކައިގެ އިންޓެރިމް ބޯޑުގައި އެސްޓީއޯ، ފިނޭންސް މިނިސްޓްރީ، އަދި އެންވަޔަރަންމަންޓް މިނިސްޓްރީގެ މަންދޫބުން ހިމެނިވަޑައިގަންނަވާނެއެވެ. އެސްޓީއޯއިން ބުނީ ފެނަކަ ސަބްސިޑަރީއަކަށް ވުމުން ޑިރެކްޓަރުންގެ ބޯޑު އެކުލަވައިލާނީ އެސްޓީއޯގެ ގަވަނަންސް ކޯޑާއި ސަބްސިޑަރީތަކަށް މެންބަރުން އައްޔަނުކުރާ އުސޫލާއި އެއްގޮތަށެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ކުރިން ވިދާޅުވީ، މިހާރުގެ ސަރުކާރު ވެރިކަމާއި ހަވާލުވިއިރު މިދިޔަ އަހަރުގެ ފަހު ކުއާޓަރުގައި ކުންފުންޏަށް ލިބުނު ގެއްލުން 24.7 މިލިއަން ރުފިޔާއަށް އެރި ނަމަވެސް، މި އަހަރުގެ ދެވަނަ ކުއާޓަރު ނިންމާލީ 7.4 މިލިއަން ރުފިޔާގެ ކުޑަ ފައިދާއަކާ އެކުއެވެ.
މުއާޒުގެ އަމާޒަކީ 2024 ވަނަ އަހަރު ނިމޭއިރު ފެނަކައަށް އަހަރަކު 25 މިލިއަން ރުފިޔާގެ ފައިދާއެއް ހޯދުމެވެ.
