އެމެރިކާއިން އީރާނާއެކު ޤާއިމުކުރި ހަނގުރާމަ ހުއްޓާލުމުގެ އެއްބަސްވުމަކީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ސިޔާސީ ހަޔާތުގައި ކުރިމަތިވި އެންމެ ބޮޑު ގޮންޖެހުން ކަމަށް މަސްރަޙު ދިރާސާކުރާ ފަރާތްތަކުން ބުނަން ފަށައިފިއެވެ. މި އެއްބަސްވުމުގެ ސަބަބުން ނަތަންޔާހޫގެ ސިޔާސީ ބިންގާ ކަމަށްވާ "ސަލާމަތީ ރައްކާތެރިކަން" ކަށަވަރުކޮށްދިނުމުގެ ސިޔާސަތު ފުނޑުފުނޑުވެ، އޭނާ ވަނީ ސަލާމަތީ ގޮތުން ބޮޑު މަޅިއެއްގައި ތާށިވެފައެވެ.

އީރާނުގެ ނުފޫޒު ކުޑަކުރުމަކީ ނަތަންޔާހޫގެ ޚާރިޖީ ސިޔާސަތުގެ މައި ތަނބަށް ވީއިރު، އީރާނު ކުރިއަށްވުރެ ވަރުގަދަވެގެން މި ހަނގުރާމަ ނިމިގެން ދިއުމަކީ އޭނާގެ ނުކުޅެދުންތެރިކަން ހާމަވާ ކަމެއްގެ ގޮތުގައި ވަނީ ސިފަކޮށްފައެވެ. އަދި އެމެރިކާގެ ސިޔާސީ މަސްރަޙު ފަރިތަ، ވޮޝިންޓަނަށް ނުފޫޒު ފޯރުވޭނެ ހަމައެކަނި ލީޑަރުގެ ގޮތުގައި ދެއްކި ސޫރަވެސް މިހާރު ވަނީ ގެއްލިފައެވެ.

އިސްރާއީލުގެ އިދިކޮޅު ލީޑަރު ޔާއިރު ލަޕިޑް ކްނެސެޓް (ޕާލަމަންޓް) ގައި ވާހަކަދައްކަވަމުން ވިދާޅުވީ، ނަތަންޔާހޫގެ ކުރިމަތީގައި އޮތީ ދެ ގޮތެއް ކަމަށެވެ. އެއީ އިސްރާއީލުގެ އެންމެ ގާތް އެކުވެރިޔާ (އެމެރިކާ) އާ ކުރިމަތިލައި ގުޅުން ހަލާކުކޮށްލުން ނުވަތަ އިސްރާއީލުގެ މަސްލަހަތުތައް ދޫކޮށްލައި އަމާންދިނުން ކަމަށެވެ.

މި އެއްބަސްވުމުގެ ދަށުން ލުބުނާނުގައި ހިޒްބުالله އަށް ދެމުންދާ ހަމަލާތައް ހުއްޓާލުމަށް އީރާނާއި އެމެރިކާއިން ބާރުއަޅަމުންދާއިރު، މިއީ އޮކްޓޫބަރު މަހު ބާއްވާ އިސްރާއީލުގެ އިންތިޚާބުގެ ކުރިން ނަތަންޔާހޫއަށް ލިބުނު ބޮޑު ހީނަރުކަމެކެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ ބައިރޫތަށް ދިން ހަމަލާތަކާ ގުޅިގެން ނަތަންޔާހޫއަށް ވަރަށް ބޮޑަށް ފާޑުވިދާޅުވެ، އޭނާގެ ނިންމުންތަކުގައި އެއްވެސް ވިސްނުންތެރިކަމެއް ނެތް ކަމަށް ވިދާޅުވެފައެވެ.

ނަތަންޔާހޫގެ ކޯލިޝަން ސަރުކާރުގައި ހިމެނޭ ހަރުކަށި ފިކުރުގެ ވަޒީރުން ވެސް ދަނީ މި އެއްބަސްވުމާ ދެކޮޅަށް އަޑުއުފުލަމުންނެވެ. ނޭޝަނަލް ސެކިއުރިޓީ މިނިސްޓަރު އިތަމާ ބެން-ގްވީރު ސޯޝަލް މީޑިއާގައި ވިދާޅުވީ، ޓްރަމްޕްގެ އެއްބަސްވުމަށް އިސްރާއީލުން ބޯނުލަނބާނެ ކަމަށާއި، އިސްރާއީލުގެ ސަލާމަތް ކަށަވަރު ނުވާ އެއްވެސް ކަމެއްގައި ބައިވެރިނުވާނެ ކަމަށެވެ.

މި ފާޑުކިއުންތަކަށް ރައްދު ދެއްވަމުން ޤުދުސްގައި ބޭއްވި ނޫސްވެރިންގެ ބައްދަލުވުމެއްގައި ނަތަންޔާހޫ ވިދާޅުވީ، އޭނާގެ މުޅި ހަޔާތް ހޭދަކުރެއްވީ އީރާނަށް ނިއުކްލިއާ ހަތިޔާރު ލިބުނަ ނުދިނުމަށް ކަމަށެވެ. އަދި ބައެއް ކަންކަމުގައި ޓްރަމްޕާ ޚިޔާލު ތަފާތުވުން ހުރި ނަމަވެސް، އިސްރާއީލުގެ ދިފާޢުގައި ކުރަންޖެހޭ ކަންކަން ކުރާނެ ކަމަށާއި ލުބުނާނުގެ ބޯޑަރުގައި ހެދި "ބަފާ ޒޯން" އިން ފަހަތަށް ނުޖެހޭނެ ކަމަށް އޭނާ ވިދާޅުވިއެވެ.

ނަމަވެސް، ހަގީގަތަކީ ޣައްޒާގެ ހަނގުރާމައަށް އަށް މަސް ވެގެންދިޔައިރުވެސް ހަމާސް ނައްތާނުލެވުމާއި، އިސްރާއީލުގެ ސިފައިންގެ ބާރު އެކި ފްރަންޓްތަކަށް ބެހިގެންގޮސް ވަރުބަލިވެފައިވުމެވެ. މަސްރަޙު ދިރާސާކުރާ ފަރާތްތަކުން ބުނާ ގޮތުގައި، ނަތަންޔާހޫގެ "މިސްޓަރ ސެކިއުރިޓީ" ލަގަބު މިހާރު ވަނީ ނުރައްކަލުގެ ތެރޭގައެވެ.