މަޖިލިސް ތެރެއިން ގެންނަން އުޅުނު ބަޣާވާތް ނާކާމިޔާބުވީ ﷲގެ މަތިވެރި ރޭވުމުން: ރައީސް

އިދިކޮޅު ޕާޓީ އެމްޑީޕީގެ ބާރުއޮތް މެންބަރުންނަށް ބަޣާވާތް ކުރުމުގެ ފުރުސަތު ނުލިބި، ޕީއެންސީއަށް ކާމިޔާބު ލިބިގެން ދިޔައީ ﷲގެ މަތިވެރި އިޒުނަފުޅުންކަމަށް ރައީސުލް ޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

ހޯމަ ދުވަހގެރޭ އޮތް ކޮންގްރެސް ޕާޓީ ހަރުގެ ޖަލްސާގައި ވާހަކަފުޅު ދައްކަވަމުން އެމަނިކުފާނު ވަނީ މީގެ ކުރިން ޕާޓީގެ ހާލަތު ހުރި ގޮތް ކިޔައިދެއްވާފައެވެ. އެގޮތުން ވެރިކަމާއި ހަވާލު ވީއިރު ދަތުރު ފެއްޓެވީ ވަރަށް ގަދަ ކަނޑެއްގަ ކަމާއި، ރައްޔިތުންގެ މަޖިލީހުގެ އެއްވެސް ބާރެއް އޭރު ނެތް ކަމަށް ރައީސް ޕާޓީގެ މެމްބަރުންނަށް ހަނދާން ކޮށްދެއްވިއެވެ. އަދި އޭރު ތިއްބެވި ބައެއް އިއްޒަތްތެރި މެމްބަރުން، ރަޢީސްގެ އެދިވަޑައިގަތުމުގެ މަތިން، ކެބިނެޓުގައި ހިމަނަން ބޭނުންފުޅުވުމުން، މަޖިލީހުގެ ގޮނޑި ދޫކުރައްވައި ރައްޔިތުންނަށްޓަކައި، ކެބިނެޓަށް ގުޅިވަޑައިގަތުމުން، މަޖިލީހުގެ ތަޅުމުގައި ޕާޓީއަށް ނިސްބަތްވާ ގޮނޑިތައް އިތުރަށް މަދުވެގެން ދިޔަކަމަށް ރައީސް ވިދާޅުވިއެވެ.

މި ބަދަލާއިއެކު އޭރު މަޖިލީހުގެ ތަޅުމުގައި ބާރުއޮތް ބައެއް ބޭފުޅުން، ރައްޔިތުންގެ ނިންމެވުން ބޮލާލާ ޖައްސަވާ، އެއްވެސް ޑިމޮކްރެޓިކް ގައުމެއް، އަދި ނިޒާމެއްގައިވެސް ކަންކަން ނުކުރާ ގޮތަށް، ބަޣާވާތް ކުރުމަށް މަސައްކަތްކުރެއްވި ކަމަށް ރަޢީސް ވިދާޅުވިއެވެ. ރައްޔިތުންގެ މަޖިލީހުގެ ތެރެއިން ފާޅުގައި އެކަން ކުރަން މަސައްކަތް ކުރި ކަމަށާއި، އެކަން އެގޮތަށް ނުވުމުން، ޕޯޑިއަމް ތަކުގައިވެސް ވާހަކަދައްކަވަން ފެށިކަމަށް ވިދާޅުވިއެވެ.

އެހެން ނަމަވެސް، ރައީސް ވިދާޅުވީ، އޭރު މަޖިލީހުގައި ތިއްބެވި ޕީއެންސީގެ މެންބަރުންގެ ހިތްވަރާއި، ރައްޔިތުންނަށް ހިދުމަތް ކޮށްދެއްވުމަށް، ޑިމޮކްރެޓިކް ނިންމެވުމަށް އިހްތިރާމް އަދާކޮށް ގައުމީ ވިސްނުމުގައި، އޭރު އެމްޑީޕީގައި ތިއްބެވި 15 ވަރަކަށް ބޭފުޅުން ޕާޓީއާ ގުޅިވަޑައިގެންނެވި ކަމަށެވެ. އަދި ކަންތަށް މިހެން ވެގެން ދިއުމުން، އެމްޑީޕީގެ މެންބަރުންނަށް ބަޣާވާތް ނުކުރެވުނީ ކަމަށާއި، އެ ފުރުސަތު އެމީހުންނަށް ނުލިބުން އެއީ ﷲގެ މަތިވެރި ރޭވުންތެރިކަން ކަމަށް ރައީސްގެ ވާހަކަފުޅުގައި ވިދާޅުވިއެވެ.

ރައީސްގެ ވާހަކަފުޅުގައި، ޕީއެންސީއަށް ރައްޔިތުން ކުރެއްވި އިތުބާރާއި، ދެއްވި ތަރުހީބު ބަލައިގަނެ، އެކަމަށް ޝުކުރު ދަންނަވާފައިވެއެވެ. އަދި ސަރުކާރަށް 1 އަހަރު ވުމުގެ ކުރިން ކޮންގްރެސް ޕާޓީގައި 75 ހާސް މެންބަރުން ހިމެނިގެން ދިއުމަކީ ރަޢީސް ދެކެން ބޭނުންވާ ކަމެއް ކަމަށް ވިދާޅުވިއެވެ.

ފާހަގަކޮށްލަން ޖެހޭ ކަމަކީ، ދާދި ފަހަކުންވެސް ކުރީގައި ވެރިކަން ކުރެއްވި ބައެއް ބޭފުޅުންނާއި، ސިޔާސީ ބައެއް ފަރާތްތަކާއި، ބީއެމްއެލްގެ ބައެއް އިސް ވެރިން ގުޅިގެން ބަޣާވާތެއް ގެންނަން ވަނީ މަސައްކަތް ކޮށްފައެވެ.