ސަރުކާރުން މިއަހަރުގެ ތެރޭގައި އަނބުރާ އަދާކޮށްފައިވާ ބޮޑެތި ދަރަނިތަކާއެކު، އަންނަ އަހަރު ރާއްޖެއިން ބޭރުގެ ދަރަނި ދައްކަންޖެހޭ މިންވަރު ދަށްވާނެ ކަމަށް ދުނިޔޭގެ ކްރެޑިޓް ރޭޓިންގ އެޖެންސީ، ފިޗް ރޭޓިންގްސްއިން ހާމަކޮށްފިއެވެ.

ފިޗުން މިއަދު އާންމުކުރި ރާއްޖޭގެ ސޮވެރިން ރޭޓިންގ ރިޕޯޓުގައި ބަޔާންކޮށްފައިވާ ގޮތުގައި، 2026 ވަނަ އަހަރު ދައްކަންޖެހޭ ބޮޑެތި ދަރަނިތަކުގެ ތެރޭގައި ހިމެނޭ ސޮވެރިން ސުކޫކް މިދިޔަ އޭޕްރީލް މަހު އަނބުރާ ދެއްކުމާ ގުޅިގެން، 2027 ވަނަ އަހަރު ރާއްޖޭގެ ބޭރުގެ ދަރަނި ދެއްކުމުގެ ބުރަ ވަރަށް ބޮޑަށް ކުޑަވެގެންދާނެއެވެ.

މި ރިޕޯޓުގައި ފާހަގަކޮށްފައިވާ ގޮތުން، 2026 ވަނަ އަހަރުގެ ފުރަތަމަ ހަ މަސްދުވަހުގެ ތެރޭގައި ދައުލަތުންނާއި ދައުލަތުން ގެރެންޓީ ދީފައިވާ ބޭރުގެ ދަރަނި ދެއްކުމަށް 1.1 ބިލިއަން އެމެރިކާ ޑޮލަރު ބޭނުންވެއެވެ. ނަމަވެސް، ސުކޫކް ކާމިޔާބުކަމާއެކު އަނބުރާ ދެއްކުމުގެ ސަބަބުން، އެ އަހަރުގެ ފަހު ހަ މަސްދުވަހު ދައްކަންޖެހޭ މިންވަރު ވަނީ 535 މިލިއަން ޑޮލަރަށް ދަށްވެފައެވެ.

މީގެއިތުރުން، 2027 ވަނަ އަހަރު ބޭރުގެ ދަރަނި އަދާކުރަންޖެހޭ މިންވަރު އިތުރަށް ދަށްވާނެ ކަމަށް ފިޗްއިން ލަފާކުރެއެވެ. އަދި އަބޫދާބީ ފަންޑާއެކު ދިވެހި ސަރުކާރުން ހަދާފައިވާ 100 މިލިއަން ޑޮލަރުގެ ޕްރައިވެޓް ޕްލޭސްމަންޓް 2031 ވަނަ އަހަރަށް ފަސްކޮށްދިނުމަކީ، ކައިރި މުސްތަގުބަލެއްގައި ދަރަނި ދެއްކުމަށް އޮތް ޕްރެޝަރު ކުޑަވެގެންދިޔަ މުހިންމު ކަމެއްގެ ގޮތުގައި އެ ރިޕޯޓުގައި ފާހަގަކޮށްފައިވެއެވެ.

މިކަމާ ގުޅޭގޮތުން މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ބުނީ، ދަރަނި ދައްކަންޖެހޭ މިންވަރު ދަށްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގެންގުޅޭ ހަރުދަނާ ދަރަނި މެނޭޖްކުރުމުގެ ސިޔާސަތުގެ ނަތީޖާ ކަމަށެވެ. އަދި އޭޕްރީލް މަހު ސުކޫކް އަނބުރާ ދެއްކުމަކީ އިގްތިސާދަށް އޮތް އެންމެ ބޮޑު އެއް ގޮންޖެހުން ނެތިގެންދިޔަ ކަމެއް ކަމަށާއި، ފިޗްއިން ރާއްޖޭގެ ރޭޓިންގ 'ސީސީސީ-' އަށް މަތިކުރުމަށް ނިންމި މައިގަނޑު އެއް ސަބަބަކީވެސް އެއީ ކަމަށް މިނިސްޓްރީން ފާހަގަކުރިއެވެ.

ސަރުކާރުން އިތުރަށް ހާމަކުރި ގޮތުގައި، ބޭރުގެ މާލީ އިދާރާތަކާއި ގައުމުތަކާ ގުޅިގެން ލުއި ގޮތްތަކެއްގެ މަތިން ފައިނޭންސިންގ ހޯދުމަށާއި، ބޭރުގެ ރިޒާވް ވަރުގަދަކޮށް، ދަރަނި ދެއްކުމުގެ ކަންކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ދަނީ މަސައްކަތް ކުރަމުންނެވެ. މާލީ ހަމަޖެހުން ގާއިމުކުރުމަށްޓަކައި ދަރަނި ރިފައިނޭންސް ކުރުމުގެ ޕްރެޝަރު ކުޑަކުރުމަކީ ސަރުކާރުގެ އެންމެ އިސް އެއް އަމާޒެވެ.