ދިވެހި ފުޓްބޯޅައިގެ ހާލަތު ދަށްވެފައިވާ ދަނޑިވަޅެއްގައި އުފާވެރި ޚަބަރެއް ފެތުރިއްޖެއެވެ. މި ގަރުނުގައި އެންމެ ގިނަ ހެޓްރިކް ހެދި ކުޅުންތެރިންގެ ލިސްޓުގައި ދިވެހި ކުޅުންތެރިއެއް ކަމަށްވާ އަލީ އަޝްފާގް (ދަގަނޑޭ) 3 ވަނައަށް އަރައިފިއެވެ.
މި ލިސްޓުގައި ދަގަނޑޭގެ ކުރިން ތިބީ ކްރިސްޓިއާނޯ ރޮނާލްޑޯ (66 ހެޓްރިކް) އާއި ލިއޮނަލް މެސީ (57 ހެޓްރިކް) އެވެ. ދަގަނޑޭގެ ފަހަތުން ތިބީ ރޮބަޓް ލެވޮންޑޮސްކީ (31 ހެޓްރިކް) އާއި ލުއިސް ސުއަރޭޒް (30 ހެޓްރިކް) އެވެ.
21 ކުޅުންތެރިންގެ މި ލިސްޓުގައި އަޝްފާގު (ދަގަނޑޭ) އާއެކު އޭޝިއާގެ 3 ކުޅުންތެރިން ހިމެނެއެވެ. އަޝްފާގު ވަނީ 35 ހެޓްރިކް ހަދާފައެވެ. އޭގެތެރޭގައި ގައުމީ ޓީމަށް ހެދި 4 ހެޓްރިކް ހިމެނެއެވެ.
Advertisement
އަޝްފާގުގެ މުހިއްމު ރެކޯޑުތަކުގެ ތެރޭގައި 2003ގައި މޮންގޯލިއާއާ ދެކޮޅަށް ހެދި ހެޓްރިކް، ގައުމީ ޓީމަށް އެއް މެޗެއްގައި އެންމެ ގިނަ ލަނޑު ޖެހި ކުޅުންތެރިޔާ އަދި ގައުމީ ޓީމަށް ލަނޑެއް ޖެހި އެންމެ ޒުވާން ކުޅުންތެރިޔާގެ ރެކޯޑު ހިމެނެއެވެ. މީގެ އިތުރުން، 2012ގައި ކެމްބޯޑިއާއާ ދެކޮޅަށް އަދި 2013ގައި ސްރީ ލަންކާ އަދި ބޫޓާނާ ދެކޮޅަށް ހެދި ހެޓްރިކްތަކަކީވެސް އަޝްފާގުގެ މުހިއްމު ހެޓްރިކްތަކެވެ.
މި ލިސްޓުގައި ހިމެނޭ އެހެން ބައެއް ފާހަގަކޮށްލެވޭ ކުޅުންތެރިންގެ ތެރޭގައި ސިންގަޕޫރުގެ އެލެކްސެންޑާ ޑުރިކް (11 ވަނަ)، ސީރިއާގެ ފިރާސް އަލް ޚަތީބް (16 ވަނަ) އަދި ފްރާންސްގެ ކީލިއަން އެމްބާޕޭ (18 ވަނަ) ހިމެނެއެވެ.
2001 ވަނަ އަހަރު އުމުރުން 15 އަހަރުގައި ފުޓްބޯޅަ ކެރިއަރ ފެށި އަޝްފާޤް، މިހާތަނަށް ކުޅެފައިވާ ހުރިހާ ބޮޑެތި ޓީމުތަކަށް ހެޓްރިކް ހަދާފައިވެއެވެ.
ދަގަނޑެ ކުޅެފައިވާ ޓީމުތަކުގެ ތެރޭގައި ވެލެންސިއާ، ނިއު ރޭޑިއަންޓް އަދި ވީބީ އައްޑޫ އެފްސީ ފަދަ ނަން މަޝްހޫރު ޓީމުތައް ހިމެނެއެވެ. އޭނާގެ ކެރިއަރގެ އެންމެ ފާހަގަކޮށްލެވޭ ހެޓްރިކްތަކުގެ ތެރޭގައި 2018 ވަނަ އަހަރުގެ އޭއެފްސީ ކަޕުގައި އިންޑިއާގެ އައިޒޯލްއާ ދެކޮޅަށް ހެދި ހެޓްރިކް ހިމެނެއެވެ. ދަގަނޑެގެ ކެރިއަރގެ ތަފާސްހިސާބުތަކަށް ބަލާއިރު، ކްލަބް ފުޓްބޯޅައިގައި 457 މެޗުން 409 ގޯލް ޖަހާފައިވާއިރު، ގައުމީ ޓީމަށް 98 މެޗުން 58 ގޯލް ޖަހާފައިވެއެވެ. މި ރިކޯޑުތަކުގެ އިތުރުން، ދަގަނޑެ ވަނީ 7 ފަހަރު ރަންބޫޓު އެވޯޑު ހޯދާފައެވެ. އަދި 5 ފަހަރު ރާއްޖޭގެ އެންމެ މޮޅު ކުޅުންތެރިޔާގެ މަގާމު ހޯދާފައިވެއެވެ.
ދަގަނޑެގެ ކެރިއަރގެ ޚާއްޞަ ކާމިޔާބީތަކުގެ ތެރޭގައި 2014 ވަނަ އަހަރު މެލޭޝިއާ ޕްރިމިއާ ލީގު ކާމިޔާބުކުރުމާއި، ރާއްޖޭގެ ޕޮމިސް ކަޕް ކާމިޔާބުކުރުން ހިމެނެއެވެ. އަދި ރާއްޖޭން ބޭރު ޓީމަކާއެކު ތަށި ކާމިޔާބުކުރި ހަމައެކަނި ދިވެހި ކުޅުންތެރިޔާ އަކީ ވެސް އަޝްފާޤުއެވެ.
