މިޔަންމާގެ އިދިކޮޅު ހަނގުރާމަވެރިންގެ ކޮންޓްރޯލްގެ ދަށުގައި އޮންނަ އަވަށެއްގައި ބާރުގަދަ އެއްޗެއް ގޮވައި، މަދުވެގެން 55 މީހުން މަރުވެ ގިނަ ބަޔަކު ޒަޚަމްވެއްޖެ ކަމަށް ރިޕޯޓްތައް ބުނެފިއެވެ.

މި ހާދިސާ ހިނގާފައިވަނީ ޗައިނާ ބޯޑަރާ ކައިރީގައި އޮންނަ ޝާން ސްޓޭޓްގެ ނަމްޚަމް ޓައުންޝިޕްގެ ކައުންގް ޓެޓް ނަމަކަށް ކިޔާ އަވަށެއްގައެވެ. މި ހާދިސާގައި މަރުވި މީހުންގެ ތެރޭގައި 25 އަންހެނުންނާއި 30 ފިރިހެނުން ހިމެނޭ ކަމަށް މަސްދަރުތަކުން ބީބީސީއަށް މައުލޫމާތު ދީފައިވެއެވެ. ނަމަވެސް ބައެއް އެހެން ރިޕޯޓްތަކުގައި މަރުވި މީހުންގެ އަދަދު މިއަށްވުރެ ތަފާތެވެ.

މި ސަރަހައްދު ކޮންޓްރޯލް ކުރާ ތައަންގް ނޭޝަނަލް ލިބަރޭޝަން އާމީ (ޓީ.އެން.އެލް.އޭ) އިން ބުނި ގޮތުގައި، މި ގޮވުން ގޮވާފައިވަނީ އާދީއްތަ ދުވަހުގެ މެންދުރު 12:00 ހާއިރުއެވެ. އެ ޖަމާއަތުން ނެރުނު ބަޔާނެއްގައި ބުނެފައިވަނީ މިއީ މައިންތަކުގައާއި ހިލަ ނެގުމުގެ މަސައްކަތުގައި ބޭނުންކުރާ ގޮވާތަކެތި "އިއްތިފާގަކުން" ގޮވައިގެން ހިނގި ހާދިސާއެއް ކަމަށެވެ.

މި ގޮވުމުގެ ސަބަބުން އަވަށުގެ ބޮޑު ސަރަހައްދެއް ސުންނާފަތިވެ، ގިނަ އަދަދެއްގެ ގެދޮރަށް ވަނީ ބޮޑެތި ގެއްލުންތަކެއް ވެފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ގޮވުން ގޮވި ތަނުގައި ބޮޑު ވަޅުގަނޑެއް ހެދިފައިވާއިރު، މުޅި ސަރަހައްދު އޮތީ ކުނިބުންޏާއި އަޅިއަށް ވެފައެވެ.

އަވަށުގެ ބައެއް މީހުން ބުނި ގޮތުގައި ގޮވުން ގޮވި ވަގުތު އެއީ ވައިގެ ހަމަލާއެއް ކަމަށް ގިނަ ބަޔަކަށް ހީވިއެވެ. މަރުވި މީހުންގެ ތެރޭގައި ކުޑަކުދިންވެސް ހިމެނޭއިރު، އެތައް ސަތޭކަ ގެއަކަށް ވަނީ ގެއްލުން ލިބިފައެވެ. ހާދިސާ ފެނުނު ބައެއް މީހުން ބުނި ގޮތުގައި އެވަގުތު މުޅި ސަރަހައްދުގައި އޮތީ ބިރުވެރިކަމާއި ހިތާމައިގެ މާހައުލެކެވެ. މީހުން ދިރިއުޅޭ ސަރަހައްދުތަކާ ކައިރީގައި މިފަދަ ނުރައްކާތެރި ގޮވާތަކެތި ބަހައްޓާފައި ހުރުމުން އާންމުން ދަނީ ކަންބޮޑުވުން ފާޅުކުރަމުންނެވެ.

މިޔަންމާގެ އަސްކަރީ ސަރުކާރާ ދެކޮޅަށް ހަނގުރާމަކުރާ އެންމެ ވަރުގަދަ އެއް ޖަމާއަތަކީ ޓީ.އެން.އެލް.އޭ އެވެ. މިފަދަ ހަނގުރާމަވެރި ޖަމާއަތްތަކުން އެމީހުންގެ ހަރަކާތްތަކަށް ފައިސާ ހޯދުމަށް އަގުބޮޑު މަޢުދަންތައް ނެގުމުގެ މަސައްކަތް ކުރެއެވެ. ނަމަވެސް ސަލާމަތީ ފިޔަވަޅުތައް ދަށްވުމުގެ ސަބަބުން މައިންތައް ވެއްޓުމާއި މިފަދަ އެކްސިޑެންޓްތައް ހިނގުމަކީ އެ ގައުމުގައި އާންމު ކަމެކެވެ.