ރާއްޖޭގެ އިގްތިސާދުގައި ފަތުރުވެރިކަމުގެ ދައުރާ މެދު ފިނޭންސް މިނިސްޓަރު މުހައްމަދު ޝަފީގު ޝައްކު ފާޅުކުރައްވައި، އިގްތިސާދުގެ ތެރޭގައި ފަތުރުވެރިކަމުގެ އާމްދަނީ ހަގީގަތުގައި ދައުރުވާ މިންވަރުގެ ސާފު މަންޒަރެއް އަދިވެސް ސާފުކޮށް ނުފެންނަ ކަމަށް ވިދާޅުވެއްޖެއެވެ.
އެމަނިކުފާނު ފާހަގަކުރެއްވި ގޮތުގައި ރާއްޖޭގެ އިގްތިސާދު ބޮޑަށް ބަރޯސާވެފައިވަނީ ފަތުރުވެރިކަމަށް ކަމަށްވާއިރު، ފަތުރުވެރިކަމުން ލިބޭ އާމްދަނީން މުޅި އިގްތިސާދަށް ކުރާ ހަގީގީ އަސަރު ބަލަން ޖެހޭ ކަމަށެވެ.
ފިނޭންސް މިނިސްޓަރު ވިދާޅުވީ ރާއްޖޭގެ އިގްތިސާދު ފަތުރުވެރިކަމުގެ ދާއިރާ އަށް ބިނާވެފައި އޮތް އިރު، ފަތުރުވެރިކަމުގެ ދާއިރާ އިން ބޮޑު އާމްދަނީއެއް ލިބެމުންދާ ކަމަށެވެ. އެކަމަކު، އެ އާމްދަނީގެ ތެރެއިން ރާއްޖޭގެ އިގްތިސާދުގެ ތެރޭގައި ސާކިއުލޭޓްވަނީ ކިތައް އިންސައްތަތޯ އެއީ އުފެދޭ ސުވާލެއް ކަމަށް އޭނާ ވިދާޅުވިއެވެ. އަދި އެ އާމްދަނީން ރައްޔިތުންނަށް ފައިދާ ލިބޭނީ ކިހާ މިންވަރަކަށްތޯ ބަލައި ގޮތްތަކެއް ހޯދަން ޖެހޭ ކަމަށް ވެސް ޝަފީގު ވިދާޅުވިއެވެ.
Advertisement
އިއްޔެގެ ނޫސްވެރިންގެ ބައްދަލުވުމުގައި މިނިސްޓަރު ޝަފީގު އަލިއަޅުވާލެއްވީ ޑޮލަރުގެ ރިޒާވް ބޮޑުކުރުމުގެ ބޭނުންތެރިކަމަށެވެ. ނަމަވެސް ޑޮލަރު އިތުރުކުރުމަށް ރާވާފައިވާ ފިޔަވަޅުތަކުން ރައްޔިތުންނަށް ނިސްބަތުން ބޮޑު އަސަރެއް ނުކުރާނެ ކަމަށާއި ޑޮލަރުގެ އިންފްލޯއަށް ބޭރުގެ ލޮޅުންތަކުން ރައްކާތެރިކަން ފޯރުކޮށްދޭ ކަމަށް ވެސް އެމަނިކުފާނު ވިދާޅުވިއެވެ.
