މަޖީދިއްޔާ ސްކޫލްގެ އާ އިމާރާތް އަންނަ އަހަރު އަޅަން ފަށާނެ ކަމަށް ރައީސް ޑރ. މުހައްމަދު މުއިއްޒު އިއުލާން ކުރައްވައިފިއެވެ. މިކަން އިއުލާން ކުރެއްވީ މަޖީދިއްޔާ ސްކޫލްގެ އަހަރީ ދުވަހާ ގުޅިގެން ތައްޔާރު ކުރި މޮނިއުމަންޓް އިފްތިތާހު ކުރަން ބޭއްވި ޖަލްސާގައެވެ.
ރައީސް މުއިއްޒު ވިދާޅުވި ގޮތުގައި މި އާ އިމާރާތް އެޅުމަށް ހަމަޖެހިފައިވަނީ ކުރީގެ ދަރުމަވަންތަ ސްކޫލް ހުރި ބިމުގައެވެ. މި އިމާރާތުގައި 40 ކްލާސް ރޫމް ހިމެނޭނެ ކަމަށާއި، ރާއްޖޭގެ ފުރަތަމަ ސްމާޓް ކްލާސްރޫމްތައް މި އިމާރާތުގައި ހިމެނޭނެ ކަމަށްވެސް ރައީސް ވިދާޅުވިއެވެ.
މީގެ އިތުރުން، ދާރުލްއުލޫމް، ނޭޝަނަލް އެޑިއުކޭޝަނަލް މިއުޒިއަމްއަކަށް ބަދަލުކުރުމަށް ނިންމާފައިވާ ކަމަށްވެސް ރައީސް ހާމަކުރެއްވިއެވެ. މި މިއުޒިއަމްއިން ރާއްޖޭގެ ތައުލީމީ ހަޔާތުގެ ތާރީޚާއި މަޖީދިއްޔާގެ ވާހަކަ ދައްކުވައިދޭނެ ކަމަށްވެސް ވިދާޅުވިއެވެ.
Advertisement
ރައީސް މުއިއްޒު އިތުރަށް ވިދާޅުވި ގޮތުގައި މި މަޝްރޫޢުތައް ކުރިއަށް ގެންދިއުމަށް އެމަނިކުފާނު އަޒުމް ކަނޑައަޅުއްވާފައިވެއެވެ. މި މަޝްރޫޢުތަކުގެ ސަބަބުން ރާއްޖޭގެ ތައުލީމީ ދާއިރާއަށް ބޮޑު ކުރިއެރުމެއް ލިބޭނެ ކަމަށް އުއްމީދު ކުރެވެއެވެ.
