ފްރާންސްގެ ޕެރިސް – އެންކްރިޕްޓް މެސެޖިން އެޕް ޓެލެގްރާމްގެ ބާނީ އަދި ސީއީއޯ ޕަވެލް ޑޫރޯވް ހޮނިހިރު ދުވަހުގެ ހަވީރު ޕެރިހުގެ ބޯޖެޓް އެއާޕޯޓަށް ވަޑައިގަތުމުން ހައްޔަރުކޮށްފި އެވެ.
ފްރާންސްގެ މީޑިއާ އިން ރިޕޯޓްކޮށްފައިވާ ގޮތުގައި އުމުރުން 39 އަހަރުގެ ޓެކް މޮގަލް ފުލުހުންގެ ބެލުމުގެ ދަށަށް ގެނެސްފައިވަނީ ރޭ 8 ޖަހާ އެހާކަންހާއިރު އެވެ. ޖެންޑަރމެރީ އޮފް އެއާ ޓްރާންސްޕޯޓް (ޖީޓީއޭ) އިން އޭނާގެ އަމިއްލަ ޖެޓުން ފޭބިތަނާހެންނެވެ.
ފްރާންކޯ-ރަޝިޔާގެ ރައްޔިތެއް ކަމަށްވާ ޑޫރޯވް ހައްޔަރުކުރިއިރު އޭނާގެ ބޮޑީގާޑާއި އަންހެނަކު ވެސް ހުއްޓެވެ. އޭނާ އަޒަރުބައިޖާނުން ފްލައިޓުން އައިސްފައިވާއިރު، އޭނާ ލިސްޓްކޮށްފައިވަނީ އެފްޕީއާރު (ވޮންޓެޑް ޕާސަންސް ފައިލް) ގައެވެ. މި މައްސަލައިގައި ހައްޔަރުކޮށްފައި ވަނީ އިބްތިދާއީ ތަހުގީގުގެ ތެރެއިން ނޭޝަނަލް ޖުޑީޝަލް ޕޮލިހުން ފްރާންސްގެ ބަލައިފާސްކުރުމުގެ އަމުރެއްގެ މައްޗަށް ބިނާކޮށެވެ.
Advertisement
ކަމާބެހޭ ފަރާތްތަކުން ބުނާ ގޮތުގައި ތަހުގީގު ބިނާވެފައިވަނީ ޓެލެގްރާމްގައި އެކަށީގެންވާ ގޮތެއްގައި މޮޑެރޭޝަނެއް ނުގެންގުޅޭ ކަމަށް ތުހުމަތު ކުރެވޭ މައްސަލަތަކުގެ މައްޗަށެވެ. ޑޫރޯވް ހައްޔަރުކޮށްފައި ވަނީ ކަމާބެހޭ ފަރާތްތަކަށް ފާހަގަ ނުކުރުމަށްޓަކައި ޖިނާއީ ނެޓްވޯކްތަކުން ބޭނުންކުރާ ކަމަށް ތުހުމަތު ކުރެވޭ އެންކްރިޕްޓް މެސެޖިން ސާވިސްތަކުގެ ފާރަވެރިކަން ބޮޑުވަމުން އަންނަ ދަނޑިވަޅެއްގަ އެވެ.
ޑޫރޯވްގެ ވަކީލުން އޭނާ ހައްޔަރުކުރުމާ ގުޅޭ ގޮތުން އަދި ބަހެއް ނުބުނެ އެވެ.
ދުނިޔޭގެ އެތައް މިލިއަން ޔޫޒަރުންނެއް ތިބި ޓެލެގްރާމް އަށް މީގެ ކުރިން ވަނީ ސަރުކާރުތަކަށާއި ގާނޫނު ތަންފީޒުކުރާ ފަރާތްތަކަށް މޮނިޓަރިން އަށް ދަތިވާ އެންކްރިޕްޝަން ފީޗާސްތަކުގެ ސަބަބުން ފާޑުކިޔުންތަކެއް އަމާޒުވެފަ އެވެ.
