ސަރުކާރުން ރަނގަޅު ކުރަންޖެހޭ ކަންކަން ރައްޔިތުންގެ ވިންދާ އެއްގޮތަށް ރަނގަޅުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ކުރިއަށްދިޔަ ލޯކަލް ކައުންސިލް އިންތިހާބާއި، ހިޔާލު ހޯދުމުގެ އާންމު ވޯޓުގެ ވަގުތީ ނަތީޖާ އިއުލާނުކުރުމާ ގުޅިގެންނެވެ.

މިއަދު ބޭއްވި އިންތިހާބުގެ ވަގުތީ ނަތީޖާ ދައްކާގޮތުން އިދިކޮޅު އެމްޑީޕީން ވަނީ ލޯކަލް ކައުންސިލް އިންތިހާބާއި ހިޔާލު ހޯދުމުގެ ވޯޓު ކާމިޔާބުކޮށްފައެވެ. ސަރުކާރު ހިންގާ ޕީއެންސީއަށް ކުރި ހޯދިފައިވަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުންނެވެ.

ރައީސް އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ، އިންތިހާބުގެ ނަތީޖާ އިހުތިރާމާއެކު ބަލައިގަންނަ ކަމަށާއި، އިންތިހާބު ކާމިޔާބު ކުރެއްވި ކެންޑިޑޭޓުންނަށް މަރުހަބާ ދަންނަވާ ކަމަށެވެ.

"ސަރުކާރުން ރަނގަޅު ކުރަންޖެހޭ ކަންކަން، ރައްޔިތުންގެ ވިންދާ އެއްގޮތަށް ރަނގަޅުކުރުމަށް ކުރަންޖެހޭ މަސައްކަތްތައް މާތްﷲ ގެ ވާގިފުޅާއެކު ކުރިއަށްގެންދާނެކަމުގެ ޔަގީންކަން ދިވެހި އެންމެހައި ލޮބުވެތި ރައްޔިތުންނަށް އަޅުގަނޑު އަރުވަން،" ރައީސް ވިދާޅުވިއެވެ.

ވަގުތީ ނަތީޖާ ދައްކާގޮތުން އެމްޑީޕީން ވަނީ އައްޑޫ ސިޓީ، ފުވައްމުލަކު ސިޓީ، ތިނަދޫ ސިޓީ އަދި މާލެ ސިޓީ ކައުންސިލްގެ ސުޕަ މެޖޯރިޓީ ނަގައިފައެވެ. އެމްޑީޕީން ކައުންސިލް އިންތިހާބުގެ 42.7 ޕަސަންޓް ކާމިޔާބުކުރި އިރު، ޕީއެންސީއަށް ލިބިފައިވަނީ 42.3 ޕަސަންޓެވެ. ނަމަވެސް، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުން ޕީއެންސީން ވަނީ 44.3 ޕަސަންޓް ކާމިޔާބުކޮށްފައެވެ.

މީގެ އިތުރުން، ދެ އިންތިހާބު އެއް ދުވަހެއްގައި ބޭއްވުމާ މެދު ރައްޔިތުންގެ ހިޔާލު ހޯދުމަށް ބޭއްވި ވޯޓުގައި، ވޯޓުލީ މީހުންގެ 70 ޕަސަންޓް (11,709 މީހުން) ވަނީ އެކަމަށް ނޫނެކޭ ބުނެފައެވެ. އެކަމަށް ތާއީދުކޮށް ވޯޓު ދީފައިވަނީ 30 ޕަސަންޓް (4,986 މީހުން) ނެވެ.