ހުޅުމާލޭގައި 1100 ވެހިކަލް ޕާކުކުރެވޭނެ ޖާގައިގެ ޒަމާނީ ޕާކިން ބިލްޑިންގްއެއްގެ ބިންގާ އަޅައި، އޭގެ އަމަލީ މަސައްކަތް މިއަދު ރަސްމީކޮށް ފަށައިފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝަރަފުވެރިކޮށްދެއްވި މި ރަސްމިއްޔާތު ބާއްވާފައިވަނީ ހުޅުމާލެ ފޭސް އެކެއްގައެވެ. މި މަޝްރޫއުގެ އަމަލީ މަސައްކަތް ފައްޓަވައިދެއްވީ ޓްރާންސްޕޯޓް މިނިސްޓަރު މުހައްމަދު އަމީން އެވެ.
ޕްރައިވެޓް ސެކްޓާ ޕްރޮޖެކްޓް އުސޫލުން ކުރިއަށްގެންދާ މި މަޝްރޫއު ހަވާލުކޮށްފައިވަނީ ބެޗް ކޮންސްޓްރަކްޝަންއާއެވެ. މި މަސައްކަތް އެ ކުންފުނިން 24 މަސްދުވަހުގެ ތެރޭގައި ނިންމައި ހަވާލުކުރަން ޖެހެއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރު އަމީން ވިދާޅުވީ، މި އިމާރާތަކީ ހަމައެކަނި ޕާކިންއަށް ހާއްސަ ތަނެއް ނޫން ކަމަށާއި، މިއީ އެއްގަމު އުޅަނދުތަކަށް ބޭނުންވާ ގިނަ ހިދުމަތްތަކެއް އެއް ފުރާޅެއްގެ ދަށުން ލިބޭނެ ގޮތަށް ފަރުމާކޮށްފައިވާ ތަނެއް ކަމަށެވެ. އެގޮތުން ވިޔަފާރިތަކަށާއި، އިލެކްޓްރިކް ވެހިކަލްތައް ޗާޖުކުރާނެ ތަންތަނުގެ އިތުރުން ކުޅިވަރު ކުޅޭނެ ޖާގަވެސް މި އިމާރާތުގައި ހިމެނޭނެއެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، މިއީ މާލެ ސަރަހައްދުގައި ދިމާވެފައިވާ ޕާކިންގެ މައްސަލައާއި ވެހިކަލް ރަޖިސްޓްރީ ކުރުމަށް ހުރި ހުރަސްތައް ނައްތާލުމަށް ރައީސް ޑރ. މުއިއްޒު ގެންގުޅުއްވާ ތަސައްވަރުގެ ބައެކެވެ.
"ސަރުކާރުގެ ޕްލޭނާ އެއްގޮތަށް ހުޅުމާލޭގައި ގާއިމްކުރާ 7 ޕާކިން ބިލްޑިންގުން ކަނޑައެޅިފައިވާ އުސޫލުގެ ތެރެއިން، އާންމު ހިދުމަތް ރާވާފައިވާ ފަރާތްތަކަށާއި އަދި ހާއްސަ އެހީއަށް ބޭނުންވާ ފަރާތްތަކަށް ވަކި އިންސައްތައެއް ވާނީ ކަނޑައެޅިފައި،" އަމީން ވިދާޅުވިއެވެ.
ސަރުކާރުގެ އަމާޒަކީ މިފަދަ ޕާކިން ބިލްޑިންގްތައް ނިމުމުން މާލޭގެ މަގުތަކަކީ އަމާން ތަނަކަށް ހަދައި، ވެހިކަލް ރަޖިސްޓްރީ ކުރުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމެވެ. ހުޅުމާލޭގެ މާސްޓާ ޕްލޭނާ އެއްގޮތަށް ފޭސް އެކެއްގައި 3 ބިލްޑިން އަދި ފޭސް ދޭއްގައި 4 ބިލްޑިން އެޅުމަށް މިހާރު ވަނީ ނިންމާފައެވެ.
