އެމެރިކާއިން އިރާނާ ދެކޮޅަށް ހިންގާ އަސްކަރީ ހަރަކާތްތަކާއި ދޭ ހަމަލާތަކުގައި، އަވަށްޓެރި ތިން ގައުމެއް ކަމަށްވާ ޔުނައިޓެޑް އެރަބް އެމިރޭޓްސް (ޔޫއޭއީ) އާއި ގަތަރު އަދި ސައުދީ އަރަބިއްޔާއިން އެހީތެރިކަން ފޯރުކޮށްދެމުންދާ ކަމަށް ބުނެ އިރާނުން އދ. އަށް ރަސްމީކޮށް ޝަކުވާ ހުށަހަޅައިފިއެވެ.
އދ. ގައި ހުންނަ އިރާނުގެ ދާއިމީ މިޝަނުން އދ. ގެ ސަލާމަތީ މަޖިލީހަށް ފޮނުވި ސިޓީއެއްގައި ބުނެފައިވަނީ، އެމެރިކާގެ އަސްކަރީ މަތިންދާބޯޓުތަކުން އިރާނަށް ހަމަލާ ދިނުމަށްޓަކައި އެ ގައުމުތަކުގެ ވައިގެ ސަރަހައްދާއި އެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބޭނުންކުރަމުންދާ ކަމަށެވެ. މިއީ ބައިނަލްއަގުވާމީ ގާނޫނުތަކާއި އަވަށްޓެރި ގައުމުތަކުގެ މެދުގައި އޮންނަންޖެހޭ އިހުތިރާމާ ޚިލާފު އަމަލެއް ކަމަށް އިރާނުން ވަނީ ސިފަކޮށްފައެވެ.
އިރާނުން ތުހުމަތުކުރާ ގޮތުގައި، އެމެރިކާއިން ސަރަހައްދީ ހަމަޖެހުން ނަގާލުމަށް ކުރާ މަސައްކަތްތަކުގައި މި ގައުމުތަކުން ބައިވެރިވުމަކީ މުޅި މެދުއިރުމަތީގެ ސަލާމަތަށް އޮތް ނުރައްކަލެކެވެ. އަދި މިފަދަ ހަރަކާތްތަކަށް ފުރުސަތު ދިނުމަކީ އެ ގައުމުތަކުން އަމަލީ ގޮތުން އެ ހަމަލާތަކުގައި ބައިވެރިވުން ކަމަށްވެސް އިރާނުގެ ސިޓީގައި ފާހަގަކޮށްފައިވެއެވެ.
މި މައްސަލައިގައި އިރާނުން ބުނެފައިވަނީ އެ ގައުމުގެ ސިޔާދަތީ މިނިވަންކަމަށް އުނިކަން އަންނަ ފަދަ ކޮންމެ އަމަލަކަށް ރައްދު ދިނުމުގެ ހައްގު ބައިނަލްއަގުވާމީ ގާނޫނުތަކުގެ ދަށުން އިރާނަށް ލިބިގެންވާ ކަމަށެވެ.
މި ތުހުމަތުތަކާ ގުޅިގެން ޔޫއޭއީ، ގަތަރު ނުވަތަ ސައުދީ އަރަބިއްޔާއިން މިހާތަނަށް ރަސްމީކޮށް އެއްޗެއް ބުނެފައެއް ނުވެއެވެ. ނަމަވެސް، މި ތިން ގައުމަކީވެސް އެމެރިކާގެ އަސްކަރީ މަރުކަޒުތައް ގާއިމުވެފައިވާ، އަދި އެމެރިކާއާ ގާތް ގުޅުމެއް ބާއްވަމުންދާ ގައުމުތަކެކެވެ.
މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، އިރާނުން ކުރި މި ތުހުމަތުތަކުގެ ސަބަބުން ގަލްފުގެ ގައުމުތަކާއި އިރާނާ ދެމެދު އޮތް ގުޅުމަށް އިތުރު ގޮންޖެހުންތަކެއް ކުރިމަތިވެދާނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެއެވެ.
