އިޤްތިޞާދީ ވަޒީރު މުޙައްމަދު ސަޢީދުގެ ދަރިފުޅާ ގުޅޭ ދޮގު މަޢުލޫމާތު ފެތުރުމުގެ ސަބަބުން ދަރިފުޅުގެ ތަޢުލީމީ މުސްތަޤުބަލަށް އަސަރުކޮށްފައިވާ ކަމަށް ވަޒީރު ވިދާޅުވެއްޖެއެވެ. މި ވާހަކަ ވަޒީރު ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
އެކްސްގައި ނުފޫޒު ގަދަ އެކައުންޓަކުން އެމަނިކުފާނުގެ ދަރިފުޅާ ގުޅުވައިގެން އަޖިއަލް އިންޓަނޭޝަނަލް ސްކޫލުގެ އިނގިރޭސި މުދައްރިސަކު ޑީޕޯޓްކުރަން މަސައްކަތްކުރާ ކަމަށް ދޮގު މަޢުލޫމާތު ފަތުރާފައިވާ ކަމަށް ވަޒީރު ފާހަގަކުރެއްވިއެވެ. މި ދޮގު މަޢުލޫމާތުގެ ސަބަބުން ވަޒީރުގެ ދަރިފުޅުގެ ތަޢުލީމީ މުސްތަޤުބަލަށް ނޭދެވޭ އަސަރުކޮށްފައިވާ ކަމަށް ވަޒީރު ވިދާޅުވިއެވެ.
ވަޒީރު ސަޢީދު ވިދާޅުވީ ސިޔާސީ ފާޑުކިޔުން ޤަބޫލުކުރާ ނަމަވެސް، ކުޑަކުއްޖެއްގެ ތަޢުލީމީ މުސްތަޤުބަލު ނުތަނަވަސްކުރުމަކީ ނާތަހުޒީބު ޢަމަލެއް ކަމަށެވެ. އަދި މިފަދަ ދޮގު މަޢުލޫމާތު ފެތުރުމަކީ ޒިންމާދާރު ކަމެއް ނޫން ކަމަށްވެސް ވަޒީރު ފާހަގަކުރެއްވިއެވެ.
Advertisement
މި މައްސަލައާ ގުޅޭގޮތުން އަޖިއަލް އިންޓަނޭޝަނަލް ސްކޫލުން މިހާތަނަށް އެއްވެސް ރަސްމީ ބަޔާނެއް ނެރެފައެއް ނުވެއެވެ. އަދި މި މައްސަލައިގައި އިތުރު ފަރާތްތަކުން އެއްވެސް ބަހެއް ބުނެފައެއް ނުވާކަންވެސް ފާހަގަކޮއްލެވެއެވެ.
