އިރާގުގެ ހަތިޔާރު އެޅި ޖަމާއަތްތަކުން އެމެރިކާ އާއި އިސްރާއީލާއި ދެކޮޅަށް ހަނގުރާމަ އިއުލާން ކޮށްފި ކަމަށް ހަބަރުތައް ބުނެފިއެވެ.

މި ފެކްޝަންތަކުން ދަނީ މެދުއިރުމަތީގައިވާ އެމެރިކާގެ އަސްކަރީ މަގާމުތަކަށާއި އެމެރިކާގެ މަސްލަހަތު ހިމެނޭ ތަންތަނަށް ގިނަ އަދަދެއްގެ ރޮކެޓާއި ޑްރޯން އިން ހަމަލާ ދެމުންނެވެ. އަދި އެކަމުގެ ޒިންމާ ވެސް ނަގާ ކަމަށް ބުނަމުންނެވެ.

ޕޮޕިއުލަރ މޮބިލައިޒޭޝަން ފޯސަސް (ޕީއެމްއެފް) އާއި އިރާގުގެ އިސްލާމިކް ރެސިސްޓެންސް ފަދަ ނެޓްވޯކްތަކުގެ ދަށުން ހިންގާ އިރާނާ ގުޅިފައިވާ މިލިޝިއާތަކުގެ ތެރޭގައި ހިމެނޭ ކަތަޢިބް ހިޒްބުالله އާއި، ސަރަޔާ އައުލިޔާ އަލް ދާމް ވެސް ވަނީ ހަނގުރާމައިގެ ތެރެއަށް ވަދެ އިރާގުގައި ހުންނަ އެމެރިކާގެ މަރުކަޒުތަކަށާއި އެމްބަސީ އަށާއި އެމެރިކާ މީހުން ތިބޭ ހޮޓާ ފަދަ ތަންތަނަށް ޑްރޯން އާއި، ރޮކެޓް އަދި މިސައިލުން ހަމަލާ ދީފައެވެ.

މި ޖަމާޢަތްތަކުގެ ގިނަ ޑްރޯން ހަމަލާތައް އަމާޒުކޮށްފައިވަނީ ޔޫ.އެސް. ބަޣްދާދު އެއާޕޯޓް ކައިރީގައި އޮންނަ ޑިޕްލޮމެޓިކް ސަޕޯޓް ސެންޓަރަށާއި، ބަޣުދާފުގައި ހުރި އެމެރިކާގެ އެމްބަސީއަށެވެ. މީގެ އިތުރުން ސަރަހައްދުގައިވާ އެމެރިކާގެ ދިހަވަރަކަށް އަސްކަރީ ސައިޓަށް ވެސް ވަނީ ހަމަލާ ދީފައެވެ.

ހަނގުރާމަ ފުޅާވެ އެމެރިކާ އަށް ލިބެމުންދާ ގެއްލުންތަކުގެ ސަބަބުުންނާއި އެމެރިކާގެ މަގުސަދު ހާސިލް ނުވުމުން، ހަނގުރާމަ ހުއްޓާލުމަށް ޕާކިސްތާން މެދުވެރިކޮށް އެމެރިކާ އިން އީރާނަށް ހުށަހެޅި ކަމަށް ވެއެވެ. ނަމަވެސް އީރާނުން ބުނީ އެމެރިކާ އާއި ވާހަކަ ދައްކަން ބޭނުން ނުވާ ކަމަށެވެ.